Aziz Amonov: "Terma jamoaga chaqirilganimni o'yindan oldin tushlikda eshitdim"

Ushbu uchrashuvda "temiryo'lchilar"ning g'alaba to'piga Aziz Amonov mualliflik qildi. Biz esa mazkur bahsdan so'ng bahs qahramonining fikrlari bilan qiziqdik. 

- "Lokomotiv" uchun "Metallurg" noqulay raqib hisoblanadi. Buni so'nggi uch yildagi natijalar ham aytib turibdi. SHunday ekan o'yin qanday o'tdi?

- Uchrashuv yuqori tempda o'tdi, desam mubolag'a bo'lmaydi. Ikki jamoa ham hujumkor o'yin ko'rsatdi. "Metallurg"ni 3 yildan beri mag'lubiyatga uchrata olmayotgan edik. Mana shu qora ananani yo'qotish uchun ham yigitlar ikki hissa kuch bilan o'ynadi. Buni uddalaganimizdan xursandman. Oldinlari so'nggi daqiqalarda gol o'tkazib yakunda alamli mag'lubiyatga uchrayotgandik. Mashg'ulotlarda ushbu kamchilik ustida ishladik. Xudoga shukur hozirda buning aksi kuzatilmoqda. 

- Jamoa oxirgi bahslarda ko'p penalti tepmoqda. Bu jamoaning hujumkor va kombinacion futbol ko'rsatayotganligidami? Odatda raqib jarima maydonchasi ichida to'pni yaxshi nazorat qiladigan jamoalarda bunday holat ko'p kuzatiladi...

- Biz doim muxlislarga yoqadigan hujumkor futbol ko'rsatamiz. O'yinimiz ko'pchilikka yoqmoqda. Ishlashdan to'xtamaymiz. 

- Mavsum boshidagi harakatlardan klub joriy yilda sovrinli o'rinlar uchun kurashishi kutilgandi. Lekin murabbiyning uslubiga ko'nikish biroz vaqt olgani bois natijalar ham ijobiy ko'rinish olmadi va ko'p ochkolar yo'qotildi. Ayni paytda jamoa o'yin jihatdan o'sishga erishdi. Bu keyingi yil yuqori o'rinlarni egallashga ishonch beradimi?

- Klubda yaxshi saviyadagi murabbiylar faoliyat olib bormoqda. Bu harakatlar o'z samarasini bermoqda. O'yinimiz shakllanyapti. Yangi murabbiy, yangi futbolchilar bilan birinchi yil ishlashimiz. Biroz qiynalganimiz bois ko'p ochkolarni yo'qotdik. Oxirigacha kurashamiz. Keyingi yil nima bo'lishini rahbariyat hal qiladi. 

- "Metallurg" bilan o'yindan so'ng O'zbekiston milliy terma jamoasining galdagi yig'iniga chaqirilganingiz haqida xabar chiqdi. Terma jamoadan taklif olganingizni qachon bildingiz?

- Terma jamoaga chaqirilganimni uchrashuvdan oldin tushlikda bildim. "Metallurg" darvozasiga urgan gollarimni ustoz va murabbiylarimga bag'ishlayman. Ularga mehnatlari uchun minnatdorchilik bildiraman. 

Abdulaziz Iskandarov yozib oldi