Azamat Abduraimov: "Oldimizdagi minimum vazifa oliy ligadagi o'rnimizni saqlab qolish"

Bosh murabbiy Azamat Abduraimov yangi mavsum oldidan o'z fikrlarini bildirib o'tdi.

- Hech qaysi murabbiy tayyorgarlikdan to'liq qoniqish xosil qilmaydi. Biz imkon qadar mavsumga puxta tayyorgarlik ko'rishga harakat qildik.

- Selekciya jarayonida katta hajmdagi ishlarni amalga oshirdik. Bu borada imkoniyatimizdan kelib chiqib ish tutdik. Raqobatni oshirish niyatida tarkibga 10dan ortiq yangi futbolchilarni jalb etganmiz. Xususan darvozabon Temur G'aniev, mudofaa chizig'ini kuchaytirish uchun esa Temur Sultonov, Sergey Docenko, Javlon Mirabdullaev, Aleksey Kasyan singari o'yinchilarni olib keldik.

- Legionerlar haqida nima deyishim mumkin? Biz qishki yig'inlar chog'ida bir nechta xorijlik futbolchilarni sinab ko'rdik. Ulardan bizga Kasyan, Docenko hamda Raskov maqul keldi. Kasyan oldin ham Andijon uchun o'ynagan. Ularga yangi jamoa va yangi chempionatga moslashib olish uchun baribir ozgina vaqt kerak bo'ladi. Umid qilamanki xorijlik futbolchilarimiz o'zlariga bildirilgan ishonchni oqlaydi.

- Biz rahbariyat bilan maslahatlashgan xolda, bu yil o'z oldimizga elitadagi o'rnimizni saqlab qolishni maqsad qilib qo'ydik. SHuningdek bu yil Andijon futbol klubining 50 yillik to'yi munosabati bilan imkon qadar yuqori o'rinlarni egallab muxlislarni xursand etishga harakat qilamiz.

Islombek Rustambekov.