Asror Aliqulov: "Raqiblardan cho'chiyotganimiz yo'q"

O'yin haqida

- Uchrashuvni yaxshi boshladik. "Qizilqum" jamoasini o'rganib chiqqandik, tarkibida bo'ydor futbolchilar ko'p. Ular va bizdagi hujum imkoniyatlarini chamalab chiqdik. Aytib o'tganimdek, o'yinni yaxshi boshladik, birinchi bo'lib gol urdik. Ikkinchi bo'lim boshida sustkashliklarga yo'l qo'ydik. Himoyada qo'pol xatoga yo'l qo'ydik. Oxirigacha kurashdik va gol urdik. Durang ham nazarimda yomon natija emas.

- "Qizilqum"da ishlagansiz, bilamiz. Shundan kelib chiqsa, bu jamoani o'rganish sizga qiyinchilik tug'dirmadimi?

- Bu haqida o'ylamadim. "Qizilqum"ning tarkibi juda kuchli. Men ko'rgan tarkib deyarli o'zgarib ketgan. Raqib yakka kurashlarda ko'proq ustunlikka ega bo'ldi.

- Murtozaev va Mashovich 2 tadan gol urishdi. Qaysi futbolchini kuchliroq deb hisoblaysiz?

- Mening futbolchim kuchli (kuladi). Baquvvat, maydonda agressiv harakat qiladi. Oxirgi o'yinlarda yanada yaxshi o'ynayapti.

- Jamoa tomonidan 9 ta o'yinda 6 ta gol kiritildi. Bu kam emasmi?

- Ko'p gol ham o'tkazib yubordik. Keyin kam gol urayapmiz. Hozir kiyinish xonasida ham aytdim, zich o'ynash hozirgi Superligada talab etilmoqda.

- "Mashal" Pro-ligadan chiqib, Superliga talabiga to'liq kirishib ketdi deb ayta olasizmi?

- Yomon o'yinlarimiz bo'ldi. Raqiblardan cho'chiyotganimiz yo'q. Ozroq ishonch etishmayapti. Ayrim futbolchilar ushbu mavsum Superligada debyut qilishayapti.

- Futbolchilarning jismoniy holati hisob-kitob qilib boriladi. "Mashal" futbolchilari bitta o'yinda qancha yugurishayapti?

- Albatta, buni doimiy nazoratga olganmiz. Eng ko'p yugurgan futbolchining natijasi 12 kilometr bo'ldi. Lekin bunaqa futbolchi bizda kam. Ayrim futbolchilarning yoshinm ham hisobga olish kerak. Eng ko'p yugurgan futbolchimiz Javohir Abdualimov bugun oilaviy sabablar tufayli qaydnomaga kiritilmadi.

- "Mashal"ning mezbonlik uchrashuvlari G'uzorda o'tayapti. Keyingi o'yinlarda ham shunday bo'ladimi?

- Buni klub rahbariyati hal qiladi. Olmaliqda o'ynagandan ko'ra G'uzorda o'ynash bizga qulayroq. Bu haqida hozir aniq ayta olmayman. Klubimiz rahbariyati va "Sho'rtan" klubiga ushbu maydonda o'yin o'tkazish imkoniyatini yaratib berganliklari uchun minnatdorchilik bildiramiz.