Asror Aliqulov: "Muxlislar g'alaba kutishadi? Murabbiylar g'alaba qozonishni istamaydimi?"

"Dinamo" jamoasi bilan uchinchi o'rin uchun kurashayotgan edik. Ular tarkib jihatdan bizdan ustun hisoblanardi. Yigitlarga o'zimiz tayyorlagan taktika asosida o'ynashni takidlagandik. Baribir yosh futbolchilarimizda tajriba kam, jismoniy jihatdan ham futbolchilar toliqib qolishdi. Yoshi katta futbolchilarni ushbu uchrashuvga jalb qilmadik. CHunki katta futbolchilar maydonda yoshlarni ortidan ergashtira olishi kerak. Biz ulardan shuni talab qilgandik. Lekin oxirgi o'yinlarda ular bor kuchlari bilan o'ynamadi. Oraliqda jamoani bir oila sifatida shakllantirishda menga biroz malaka etishmadi. Barchasi o'z qo'limizda edi. Imkoniyatimiz yuqori baholangandi. Jamoaga transfer taqiqi qo'yilgan. Bu qachon hal qilinishi bizga qorong'u. Yosh futbolchilarni katta futbolga tezroq kirishi va o'zida shuni his qilishi uchun jalb qilmoqdamiz. Keyingi mavsumda "SHo'rtan" shanini mana shu yigitlar himoya qilishi mumkin.

Bu yil qiyin o'tdi. Muxlislar g'alaba kutadi, lekin tasavvur qiling murabbiylar g'alaba qozonishni istamaydimi? Jamoamizda futbolchi tanlashda qolgan jamoalarga qaraganda imkoniyat yo'q edi. Qiyin o'yinlarda futbolchilar o'z zimmalariga ko'p narsani olishdi.

Hozirda sog'liqni tiklab ozroq dam olishni niyat qilganman. Faoliyatimni qaerda davom ettirishim yaqin ikki yoki uch haftada aniq bo'ladi",- deydi Asror Aliqulov.