Asror Aliqulov: "Ikkinchi taym uchun yigitlarga rahmat aytaman"

- Afsuski, o'yinni yomon boshladik. Gol o'tkazib yuborgach, keyin uyg'ondik. OKMK bir nechta uchrashuvdan beri g'alaba qozona olmayotganini bilardik. Shunga qaramay bu jamoaning o'yini yaxshi yo'lga qo'yilgan. Ikkinchi taymda o'yinni kuchaytirishga harakat qildik, lekin raqib himoyada bexato harakat qildi. Bosim uyushtirdik, hatto bahs oxirlarida qulay vaziyatga ega bo'ldik. Ammo yakunda kichik hisobda imkoniyatni boy berib, mag'lub bo'ldik.

- "Mashal" besh nafar himoyachi bilan o'ynab ham standart vaziyatdan gol o'tkazib yubordi. Balki jamoaga yaxshi himoyachi kerakdir?

- Superligada yaxshi ishtirok etish uchun har doim yaxshi o'yinchilar kerak bo'ladi. Bu faqat himoya chizig'i bilan bog'liq emas. Hamma chiziqlarga yaxshi o'yinchilar kerak. Bu hozirgi Superliganing talabi. Biz ham bu borada futbolchilar bilan ishlayapmiz, mashg'ulotlarda uqtiryapmiz, o'yinchilarni uyg'otishga harakat qilyapmiz. O'yindan oldin ko'rsatma berganda hatto raqib o'yinchilarining nomigacha aytamiz. Kim kimni yopishi kerakligi haqida ko'rsatma beramiz. Ammo bugun o'zingiz ko'rdingiz, beshta himoyachi bilan o'ynab ham gol o'tkazdik. Lekin ikkinchi bo'limdagi o'yin uchun yigitlarga rahmat aytaman.

- Bugun Xumoyun Murtazoevga raqib deyarli o'yin bermadi. Shunday holatlarda nimadir o'zgartirish kiritgan maqul emasmi?

- Zaxiramizdagi hujumchi o'yinni kuchaytira olmasdi, chunki OKMK himoyasi baribir kuchli ekanini bilardik. Ularda mahoratli futbolchilar ko'p. Bizga yaxshi saviyadagi yarim himoyachilar ham kerak. Bunday o'yinlarda saviya ko'p narsani hal qiladi.