Asror Aliqulov: "Birinchi bo'limda bizga ikkinchi bo'limdagi kabi shijoat etishmadi"

- O'yin haqida

- Shiddatli o'yin bo'ldi. "Bunyodkor" hujumkor jamoa, tarkibida baland bo'yli futbolchilar bor. Shu bois birinchi bo'limda raqib markazdan hujumdan o'tmasligi uchun harakat qildik. Himoyalandik, hujumga chiqishda qiyinchiliklarga duch keldik. Gol o'tkazib yubordik. Ikkinchi bo'limni yaxshi boshladik, hujumlar tashkil etdik va gol urdik. Birinchi bo'limda bizga ikkinchi bo'limdagi kabi shijoat etishmadi. VAR golni nega bekor qilganini tushunmadim, o'yindan tashqari holatdir balki. Keyinchalik ham gol urdik, o'yinning oxirida yoki biz, yoki raqib yutib ketishi mumkin edi. Faollik uchun yigitlarga minnatdorlik bildiraman.

- Ikki xil bo'lim guvohi bo'ldik. Jamoada ikkinchi bo'limda faollik ortishiga nima turtki bo'ldi?

- Ehtimol, qayd etilayotgan hisobdan kelib chiqib bo'lishi mumkin. Birinchi bo'limda raqib tezlik tomonlama ustunlik qildik. Himoyalandik, hujumga chiqa olmadik va ko'p kuch yo'qotdik. Ikkinchi bo'limda amalga oshirilgan o'zgarishlar o'yinimizni kuchaytirdi. Yigitlar borlarini berib harakat qilishdi va durang natijaga erishdik.

- Hakamlik haqida fikringiz qanday?

- Birinchi bo'lib bizning golimiz bekor qilindi. VAR ko'rib chiqdi, shunday xulosaga kelindi. Ikkinchi bo'limda bizning darvozaga urilgan gol ham VAR tomonidan bekor qilindi. Blogerlar vaziyatni oynai jahon orqali ko'radi, ularga jarayon yaxshiroq ko'rinadi. Muhimi futbolchilar o'z ishlarini qilishdi.

- Jamoangiz hujum chizig'ini 5 ballik tizimda necha ballga baholagan bo'lardingiz?

- Endi "Bunyodkor"ga qarshi hujumdanoq himoyani tashkil qilishimiz kerak. Ko'rdingiz, Humoyun Murtozaev to'pni darvozabondan "o'g'irlab" qo'ydi, biroq o'sha vaziyatda qandaydir omad kelmadi. Og'ir o'yin, Humoyun Murtozaev bugun yaxshi harakat qildi. Zaxiradan o'yinga qo'shilgan Shohnazar Norbekov ozroq o'yin tempiga kirishib keta olmadi desak to'g'riroq bo'ladi.