Asror Aliqulov: "Aral Samali" bo'ydor hujumchilar evaziga g'alaba qozondi"

"Qoraqalpoq millatiga, Nukus shahriga bizni iliq kutib olishgani uchun minnatdorchilik bildiramiz. "Aral" klubining Pro ligadagi ilk g'alabasi bilan tabriklayman. O'yin shiddatli bo'ldi. Raqib safida bo'ydor futbolchilar ko'p, ikkinchi qavatda ularda yaxshi imkoniyatlar bo'ldi. Bugungi mag'lubiyatga himoyachilarimizning ishonchli o'yin namoyish eta olmagani sabab bo'ldi deb o'ylayman. Bugungi mag'lubiyat o'zimizning xatolardan keyin kelib chiqdi", - deydi Asror Aliqulov.

- "Aral Samali" haqida qanday fikrdasiz?
- Agar "Aral" keyingi o'yinlarda ham shunday o'ynasa boshqa klublar bilan bahslarda ancha qiynaladi. Sababi boshqa jamoalarda tajribali va bo'ydor himoyachilar ko'p. SHunday ekan keyingi o'yinlarda "Aral" raqiblarga qarab taktikani o'zgartirib borsa kerak.

- O'yin suniy maydonda o'tdi...
- Uchrashuv suniy maydonda bo'lishini bilardik. Futbolchilarimizga maysa biroz uzunligini uqtirgandik, to'pning harakatini bir-ikkita vaziyatdan keyin bilib olsa bo'lardi. Ammo bizning futbolchilarning ko'pi juda yosh va tajriba etishmadi.

- Raqib safidagi qaysi futbolchini ajratib ko'rsata olasiz?
- Navro'zbek Alimov va Azamat Allaniyazovni juda yaxshi taniyman. Ular himoyachilarimizga tinchlik berishmadi. Ikkala bo'ydor hujumchini alohida ajratib ko'rsata olaman. "Aral" ortga qaytmaydigan oxirigacha kurashishini futbolchilarimizga uqtirgandik.