Artur Gevorkyan: "Eng yaxshi futbolchi bo'lishim men uchun kutilmagan yangilik bo'ldi"

- Artur, sovrin muborak! 2015 yilgi O'zbekiston chempionatining eng yaxshi futbolchisi bo'lishingizni kutganmidingiz?

- To'g'risi, kutmagandim. Bu men uchun kutilmagan yangilik bo'ldi. Albatta bu kabi sovrinlarni yutish futbolchi uchun juda quvonarli holat. O'tgan yili biz O'zbekiston kubogini qo'lga kiritishni o'z oldimizga vazifa qilib qo'ygandik. SHu bois bor etiborimni jamoaviy yutuqlarga qaratganman. Meni eng yaxshi deb topishgani uchun xursandman. Bu yutuq zamirida nafaqat meni, balki butun jamoadoshlarimning xizmatlari yotibdi. Ularsiz men bu kabi sovrinlarga ega chiqolmasdim. SHu fursatdan foydalanib, men butun jamoadoshlarimga, murabbiylarimga rahmat aytmoqchiman. Bu sovrinda ularning xizmatlari yuqori.

- Yangi mavsumda o'z oldizga qanday maqsadlarni qo'ygansiz?

-  Men uchun jamoaviy yutuqlar katta ahamiyat kasb etadi. SHu bois shaxsiy maqsadlarni bir chetga surib qo'ygan holda, bor etiborimni jamoaviy maqsad va vazifalarni  amalga oshirishga qarataman.

- 2015 yilda Samvel Babayan O'zbekistonning eng yaxshi murabbiyi deb topildi. Ro'ziqul Berdiev esa so'rovnoma natijalariga ko'ra, ikkinchi o'rin bilan chegaralandi. Sizningcha, o'tgan yili kim eng yaxshi murabbiy bo'lishga loyiq edi?

- Menga qolsa Ro'ziqul Berdievni birinchi o'ringa qo'ygan bo'lardim. O'tgan mavsumda Berdiev O'zbekiston kubogini qo'lga kiritdi. CHempionatda bronza medallarini oldik. Mana yaqinda O'zbekiston Superkubogida ham zafar quchdik. To'g'risi, bu so'rovnomada kimlar ishtirok etadi va qay tarzda aniqlashadi bilmadim-u, ammo mening shaxsiy qarashimcha, Ro'ziqul Berdiev 2015 yilda eng yaxshi murabbiy bo'lishga munosib edi. Bu bilan Samvel Babayanni ranjitmoqchi emasman. Babayan ham yaxshi mutaxassis. Bu ikki murabbiy bir-biridan farq qiladi va ularning futbolga bo'lgan qarashi ham boshqacha. Men uchun Ro'ziqul Berdiev eng yaxshi murabbiy.