Anvar Rahimov: “Oliy ligada ham muxlislarni xursand qilishga harakat qilamiz”

- Jamoa safiga ikkinchi bosqich arafasida qo'shildingiz. SHunga qaramay qisqa fursat ichida moslashib keta oldingiz. Bunga qanday erishdingiz?
- Bilasizmi jamoadagi deyarli 70 foiz futbolchi bilan bunga qadar ham munosabatlarimiz yaxshi edi. Ayniqsa etakchi o'yinchilar Aziz To'xtaboev va Aziz Ashurov bilan aloqam bor edi. Albatta ular ham yangi muhitga ko'nikib borishimda yordam berdi. To'g'risi bu borada aytarli muammoga duch kelmadim. Muhit yaxshi. Bundan tashqari ilgari ham jamoamni o'zgartirganim uchun yangilik bo'lmadi.

- “Qo'qon-1912”ga kelishingiz bevosita bosh murabbiy bilan bog'liq bo'lsa kerak?
- Ha. Rustam Rahmonovich jamoaga taklif etayotib, maqsad kuchlilar safiga chiqish va kelasi yil ham oliy ligada munosib ishtirok etish ekanligini bildirgach, hech ikkilanmasdan kelishga qaror qildim. Aniq maqsad borligi tufayli bir-birimizga yordam berish uchun kelganman. O'ylaymanki ushbu variantni tanlab adashmadim. SHu fursatdan foydalanib, Abdullaevga ham minnatdorchilik bildirib qolaman. Negaki menga ishonch bildirib, mashg'ulotlarda ham alohida men bilan ishlab, sport formamni tiklanishida bu murabbiyning hissasi katta.

- Dastlabki yig'in haqida fikringiz qanday?
- Yaxshi. Tatildan keyin futbolchilarni o'z formasiga kirib olishi va jismonan tayyor bo'lishi uchun tiklanish jarayoni desa ham bo'ladi. Yanvar oyidan yig'inimiz yanada jiddiy tus oladi deb o'ylayman.

- Kelasi yil endi jamoangiz oliy ligada ishtirok etadi. Bunga siz qanchalik tayyorsiz?
- Xudoga shukur tayyormiz. Har xolda shunga intilyapmiz. Mashg'ulot jarayonida hamma astoydil mehnat qilmoqda.

- SHaxsan o'zingizni bugungi xolatingizdan ko'nglingiz qay darajada to'lmoqda?
- CHempionat boshlanishiga hali yana ikki oy vaqt bor. Oldinda bizni qiyin yig'inlar kutib turibdi. Hozir 60-70 foiz tayyormiz deyishim mumkin. Fevral oyida Turkiyada yig'in tashkil etiladi. Mana shu safardan so'ng o'ylaymanki 90-95 foizga tayyor bo'lamiz. Qolganini esa chempionat ko'rsatib beradi.

- Qo'qonlik muxlislar jamoa birinchi ligada ishtirok etayotganida g'alabalarga ko'nikib qoldi. Oliy ligada esa tan olish kerak, har bir turda zafar quchish juda qiyin bo'ladi. Muxlislarga nima degan bo'lardingiz?
- Avvalambor ishqibozlarimizga bu yil ajoyib qo'llab-quvvatlab turishgani uchun kattakon rahmat aytaman. Ajoyib manzaraga guvoh bo'ldik. Har bir uchrashuvda qarsak chalib ishqibozlik qilishsa bu har futbolchining kuchiga qo'shimcha kuch qo'shadi. Juda ham yoqimli holat. Nasib qilsa oliy ligada ham ularni xursand qilishga xarakat qilamiz. Eng avvalo birinchi navbatda futbolni aynan muxlislar uchun o'ynaymiz. Ularga yoqadigan o'yin ko'rsatadigan bo'lsak, ijobiy natija ham bo'ladi.

- Sir emaski, biror futbolchi viloyat jamoalarida o'ynab yuqori saviyaga ko'tarilganida darrov poytaxtning grand klublariga o'tib ketish xolatlari uchramoqda. Bu esa muxlislarda ko'pincha etiroz paydo bo'lishiga sabab bo'ladi. SHuning uchun aytingchi, Qo'qon-1912 ham siz uchun tramplin vazifasini o'tab bermaydimi?
- Yo'q. SHaxsan men Qo'qon-1912da shunchaki o'ynab yurganim yo'q. Bu erda o'zimga yarasha niyatlarim bor. Qo'qonda futbolni juda ardoqlashadi. SHaroitlar yaxshilanib borilsa, hech bir futbolchi ketmaydi. Lekin bu degani butun futbolchilik faoliyatimni shu erdam o'tkazaman degani ham emas. Ko'plab o'yinchilar kabi mening ham xorij klublarida o'ynash niyatim yo'q emas.


Islombek Rustambekov.