Anvar Berdiev: "SHo'rtan" uy jamoasi emas. Pro ligada ochko osonlikcha qo'lga kiritilayotgani yo'q"

"O'yin haqida nima ham derdim, oddiy bo'lmagan bahsda g'alaba qozondik. "Do'stlik" jamoasida bosh murabbiy o'zgargan va ular o'tgan turda ilk uch ochkosini qo'lga kiritgandi. Tabiiyki, ruhiy ko'tarinkilik bor edi. Xudoga shukur, oldimizdagi vazifani bajardik. Futbolchilarimga borlarini bergani uchun rahmat aytaman",- deydi Anvar Berdiev. 

- "SHo'rtan" uy jamoasi bo'lib qolayotgandi. Safarda esa ko'p ochkolar yo'qotmoqda. Bugun mehmondagi ilk 3 ochkoga erishildi. Bu raqib darajasidan kelib chiqib shunday bo'ldimi yoki jamoa raqib maydonida qanday o'ynashni o'rgandimi?

- "SHo'rtan"ni uy jamoasi demagan bo'lardim. Safarda ham o'yinlar qiyin o'tmoqda. Pro ligada o'tkinchi uchrashuvlar yo'q. Ochkolar osonlikcha olinmayapti. Bu bilan to'xtab qolmoqchi emasmiz. 

- Ikkinchi bo'limda "Do'stlik" bosimni oshirgan sari SHahboz Nuriddinovda xatolar ko'p kuzatildi. Uni almashtirmaslik zaxirada mos nomzod yo'qligi bilan bog'liqmi yoki sizning ishonchingiz?

- Zaxiramizda futbolchilar bor. SHahboz Nuriddinov o'ziga yuklatilgan vazifani qo'ldan kelgancha bajarishga harakat qildi. Endi xatolarni ko'rib chiqamiz va ustida ishlaymiz. 

- Birinchi davraning o'rtasidan o'tdik. "SHo'rtan" siz istagan holatga kirib boryaptimi?

- Istaymizmi yoki yo'q tarkibimizda yangi futbolchilar ko'p edi. Ular bir-birlarini tushunib olishlari uchun vaqt kerak. O'ylaymanki, uchinchi va to'rtinchi davraga kelib yanada chiroyliroq o'yin ko'rsatamiz.