Anvar Berdiev: "Derbi"lar hamisha murosasiz ruhda o'tgan"

- Anvar aka, bugungi o'yin haqida fikrlaringizni bildirib o'tsangiz..
- Avvalombor, barchaga assalomu alaykum. O'yinni o'zlaring ko'rib guvohi bo'ldinglar, haqiqatdan ham "derbi" maqomiga mos bellashuv bo'ldi. "Derbi"lar hamisha qiyin bo'lgan, ayniqsa vodiy jamoalari o'rtasidagi o'yinlar murosasiz ruhda kechgan. Biz hozir bir ochko oldikmi, yoki ikki ochko yo'qotdikmi, bir narsa deyish qiyin. Lekin jamoamiz futbolchilariga rahmat aytaman, yigitlar oxirigacha borlarini berib kurashishdi. Navbatdagi o'yinlarga hozirdanoq tayyorgarlikni boshlaymiz.

- Raqib jamoa tomonidan bugungi o'yinda 14 kishiga qarshi o'ynadik degan fikrlar aytib o'tildi. Bunga munosabatingiz qanday?
- Endi bilmadim, agar "Turon" 14 kishiga qarshi o'ynagan bo'lsa, maydondagi uch hakam ham bizni libosda bo'lishi kerak ediku. Ko'rdinglar, qancha vaziyatlarda bizning futbolchilar kartochkalar bilan jazolanishdi. Aslida bu haqida gapirmoqchi emasman, hakamlarni ishini nazorat qiladigan qo'mita bor. Bugungi o'yin uchun hakamlarga etirozim yo'q.

- Sizning fikringizcha, hakamlar o'yin tizginini nazoratdan chiqarib yubormadimi?
- Endi hakam ham barchamiz qatori oddiy inson. Ko'rayapsiz, oddiy vaziyatlarda futbolchilar ham xatoliklarga yo'l qo'yishmoqda. Bugungi o'yinda maydonning har bir qarichi uchun jiddiy kurash kechdi, bundan bellashuvda hakamlik qilish oson emas. Takror aytaman, hakamlar qo'mitasini nazorat qiladigan alohida qo'mita bor.

- Jamoaga yangi kelib qo'shilgan futbolchilar qachon o'yinlarga qo'shilib ketishi mumkin?
- Tarkibimizga yangi jalb etilgan futbolchilarni asta-sekin o'yinlarga tayyorlab borayapmiz. Ko'proq hujum chizig'i vakillarini jalb etganmiz, bittasini tushirib, bittasini maydondan olayapmiz. Bazi futbolchilarga vaqt etmay qolyapti. Tez orada yangi qo'shilgan futbolchilar ham o'yinlarimizga to'liq qo'shilib ketishadi" - deydi "Istiqlol" bosh murabbiyi.