Andrey Miklyaev: "Guruhdan chiqa olsak chorak finalga etib bora olamiz"

Ayni paytda "Lokomotiv" vakillari Dubayda bo'lib turishibdi. Bugun o'yindan oldingi matbuot anjumani tashkil etildi.

Matbuot anjumanida dastlab "Lokomotiv" bosh murabbiyi Andrey Miklyaev va himoyachi Muhammad Kone savollarga javob qaytarishdi.

Andrey Miklyaev: - Ertaga ikkala jamoani ham qiziqarli va muhim bahs kutmoqda. Ertangi o'yinda bizning guruhdan chiqishimiz hal bo'ladi. Buning uchun esa faqat g'alaba qozonishimiz shart. Raqibimiz "Al Ahli"ni durang ham qoniqtiradi. O'ylaymanki, ertangi bellashuvda jamoamiz chiroyli o'yin ko'rsatgan holda g'alaba qozonadi va guruhdan chiqadi.

Jamoamiz oldiga bu yil CHempionlar ligasida qo'yilgan vazifa - avvalo guruhdan chiqish. Biz o'tgan yil chorak finalga qadar etib borgandik, o'ylaymanki, guruhdan chiqsak bu yil ham shu natijani takrorlay olamiz. OCHLda har bir o'yin bosim ostida o'tadi va ertangi uchrashuv ham bundan xoli emas. Safimizda 20 nafar yaxshi futbolchi bor va ular bir-birlarining o'rnini to'ldira olishadi.

Muhammad Kone: - Bosh murabbiy aytib o'tganidek, ertaga faqat g'alabani ko'zlab harakat qilamiz. Bizga bu o'yindagi yutuq juda zarur. Buning uchun havoning juda issiqligi ham tasir o'tkazmasligi kerak. "Al Ahli" kuchli jamoa, lekin ularni Toshkentda mag'lub etganmiz. Ertaga ham shu natijani takrorlashga harakat qilamiz.