“Andijon”: Kim qancha o'ynadi?

Joriy yilgi chempionatni andijonliklar musobaqa jadvalida 13-o'rinda yakunlashdi. Jamoa 30 uchrashuvda 8 marta g'alaba qozonib, 4 bor durang o'ynadi va 18 o'yinda imkoniyatni boy berdi.

CHempionat davomida “Andijon” tarkibida 27 nafar futbolchi maydonga tushdi. Ularning orasida eng ko'p uchrashuvni Javlon Guseynov o'tkazdi. Bu himoyachi oliy liga bahslarida 29 marta maydonga tushdi. Ana shu bellashuvlarda Guseynov uch bor sariq kartochka oldi. Undan keyingi o'rinlarda Gennadiy Moshnyaga, Davron Tursunov va Abdumalik Abdullaev 28 ta o'yinda to'p surdilar. Ikkinchi davrada tarkibga qo'shilgan tajribali hujumchi Anvar Berdiev jamoaning eng yaxshi to'purari bo'ldi.

U chempionat bahslarida 11 uchrashuvda maydonga tushib, raqiblar darvozasini 7 bor ishg'ol etdi. Ibrohim Otaxonov esa mavsum mobaynida hakamlar tomonidan eng ko'p jazolangan futbolchi bo'ldi. U 11 ta sariq va bitta qizil kartochkani o'z hisobiga yozib qo'ydi. Sanjar Asqaraliev esa hakamlar tomonidan 8 bor ogohlantirildi.

Bundan tashqari Farhod Bekmurodov, Tursunboy Xusanov va Farruh Mirzaev bu yil oliy ligada o'z debyutlarini o'tkazishdi.