Alisher Nikimbaev: "Nasaf" eng qiyin guruhdan o'rin oldi"

"LOKOMOTIV" UCHUN QUR'A QULAY KELDI

- O'ylashimcha, "Lokomotiv" uchun qura qulay keldi. Guruhda "Loko"dan unchalik kuchliroq raqiblar deyarli yo'q. Masalan, Dubayning "Al Nasr" jamoasini olaylik. To'g'ri, ular bu yili BAAda ikkita kubok sohibiga aylandi. Lekin ular BAAning eng kuchli jamoalari qatoriga kirmaydi. "Al Nasr" tartib-intizom borasida etakchilar qatorida bo'lishi mumkin. Ammo shuni aytish kerakki, "Al Nasr" engilmas jamoa hisoblanmaydi.
"Sepaxon" ham "Lokomotiv"dan kuchli emas.  Umuman oxirgi paytlarda Eron jamoalarining saviyasi tushib ketdi. Pley-offdan "Al-Ittihod" jamoasi guruh bosqichiga chiqsa kerak. Biroq "Al-Ittihod" ham avvalgi kuchga ega emas.


"PAXTAKOR"NING MUAMMOSI RAQIBLARIDA EMAS, BALKI O'Z O'YINI VA TARKIBIDA

- "Paxtakor"ning asosiy raqibi "Al Hilol" bo'lishi aniq. Ikki mavsumdan buyon OCHL yarim finaliga qadar etib borgan "Al Ahli" Osiyodagi eng kuchli jamoalar qatorida turishi aniq. "Traktorsozi" esa o'rtamiyona jamoa. Pley-offdan esa qaysi jamoa chiqishi nomalum. "Al Jazira" bugungi kunga kelib katta muammolarga duch kelmoqda. Jaziraliklar bugun "Fujayra"ga ham yirik hisobda yutqazishdi va turnir jadvalida 11-pog'onada bormoqda. Yanvarda "Al Jazira"da katta o'zgarishlar ruy berishi aniq. Ammo jamoa pley-offgacha tiklanishga ulgurmasligi mumkin. demak "Al Sadd"da guruh bosqichiga chiqish imkoniyatlari yuqori. Lekin "Paxtakor"ning asosiy muammosi raqiblarida emas, o'zining o'yini va tarkibida bo'lishi mumkin. Jamoani kim boshqaradi, qaysi futbolchilar qoladi-yu, kimlar ketadi, shularni ko'rish kerak.


"NASAF" ENG QIYIN GURUHDAN O'RIN OLDI

- Qarshining "Nasaf" jamoasi eng qiyin guruhdan o'rin oldi. "Al Ayn" BAAning amaldagi chempioni va bugungi kunda ham musobaqa peshqadami. Yozda jamoaning barcha legionerlari ketgan bo'lsa ham, bu narsa ularning o'yinlariga salbiy tasir ko'rsatgani yo'q. Saudiyaning "Al Ahli" jamoasi kuchli va jiddiy raqib. Buni "Nasaf" yaxshi biladi. Pley-offdan qaysi jamoa chiqishidan qatiy nazar guruhda "Nasaf"ga munosib qarshilik ko'rsatadi.


"BUNYODKOR" HAQIDA

- "Bunyodkor" haqida gapiradigan bo'lsam, toshkentliklarga qiyin bo'lishi kundek ravshan. O'tgan safar "Al Jazira"ni osonlik bilan mag'lub etishganini tezda unitish kerak. "Al SHabab" uchun OCHL bu katta chaqiruv. SHu boisdan bu o'yinga ular bor kuchlarini sarf etishlari aniq.


JAMOALARIMIZ TARKIBLARINI KUCHAYTIRISHLARI LOZIM

- Birinchi o'rinda barcha jamoalarimiz tarkiblarini kuchaytirib olishlari zarur. Bu borada klublarimiz ishni boshlashlari kerak. "Bunyodkor" va "Paxtakor" esa murabbiylar shtabini ham kuchaytirib olishi lozim. Agarda hammasi joyida bo'lsa, to'rttala jamoalarimiz ham guruhdan chiqishlari uchun imkoniyatlar mavjud.