Aleksey Nikolaev “Paxtakor”ga qaytdi

Faqat bu safar murabbiy sifatida. O'tgan mavsum “Dinamo” (Samarqand) sharafini himoya qilgan 39 yoshli Nikolaev bu yil butsalarini mixga ilishga qaror qildi. Sobiq futbolchiga “Paxtakor” klubidan taklif bo'ldi va endilikda Aleksey akademiyada bolalar bilan ishlashni boshlab yubordi.

Muxlislarga yaxshi malumki, Nikolaev O'zbekiston chempionatlarida 300dan ziyod uchrashuv o'tkazgan. “Paxtakor”da esa 80dan ziyod bellashuvlarda ishtirok etgan. SHuningdek Aleksey Nikolaev milliy terma jamoada ham 2002-2008 yillar davomida 42ta o'yinda maydonga tushishga muvaffaq bo'lgan.

Nikolaevning futbolchilik faoliyatidagi klublariga nazar tashlaydigan bo'lsak, o'zimizda “Qizilqum”, “Paxtakor”, “Dinamo”, “Bunyodkor”, “Buxoro”, “NBU-Osiyo”  hamda “Qo'qon-1912” kabi jamoalarda o'ynaganini ko'rishimiz mumkin. SHuningdek u xorij klublarida ham faoliyat yuritib qaytgan. Xususan, Rossiyaning “SHinnik”, Xitoyning “SHenchjen Rubi” hamda Qozog'istonning “Aktobe” singari jamoalarida o'ynagan.

Albatta Nikolaev yuqorida nomlari keltirib o'tilgan klublarda tajribali mutaxassislar bilan birga ishlagan. Ulardan o'rganganlarini endilikda bolalar futbolida amalda qo'llaydi.