Aleksandr Xomyakov: "O'yinimizdan qoniqdim deb ayta olmayman, chunki ko'p narsa o'xshamadi"

- Qo'lga kiritilgan bir ochko bilan tabriklaymiz. O'yin haqida fikringiz?

- Durang uchun tabriklamasangiz ham bo'ladi, chunki biz uchun har bir o'yin finaldek gap va faqat yutuq uchun o'ynayapmiz. Afsuski, o'tgan tur "Andijon" bilan bahsda va bugun "Neftchi"ga qarshi bellashuvda muhim ochkolarni boy berdik. Bugungi o'yinimizdan qoniqdim deb ayta olmayman, chunki ko'p narsa o'xshamadi. Balki "Neftchi" shundoq ham kuchli, ular chempionlikka kurashyapti deyishingiz mumkin, lekin biz ham Superligada qolish uchun kurash olib boryapmiz va bu o'rinda bizga ham g'alaba kerak bo'ladi. O'zimiz o'ylagan reja asosida raqibga xavf tug'dira olmadik. Hujumda ishimiz o'xshamadi. Uchrashuvning dastlabki 15-20 daqiqasini yaxshi o'tkazdik. Ammo keyin qovushmay qoldi, avvalo maydon markazini boy berdik. Hatto bir kishi kam bo'lib qolganda ham tizginni o'z qo'limizga ola bilmadik. Lekin yakunda bir ochkoni qo'lga kiritdik.

- Anchadan beri kuzatyapmiz, jamoangiz o'yinni yaxshi boshlayapti, o'zingiz aytib o'tgandek 15-20 daqiqa zo'r harakat qilyapti, birinchi bo'lib gol ham uryapti, ammo shundan keyin temp tushib himoyaga o'tib olmoqda. Bugun esa buning aksini ko'rdik, jamoangiz gol o'tkazganidan so'ng ancha faollashdi. Bu taktika bilan bog'liqmi?

- Bugun bunday gol o'tkazib yubormasligimiz kerak edi. Yana qaytarib aytaman, turnir jadvalidagi holat bizni oxirigacha faol bo'lishga va agressiv futbol namoyish etishga undamoqda. Har bir uchrashuvda faol bo'lishimiz shart. Chempionat tugashiga oz qoldi, zaxira o'rindig'imiz ham keng emas, biroq nimadir qilmasak bo'lmaydi. Bu borada doim yigitlarga kerakli maslahatlarni beryapmiz. Futbolda o'yin ritmini boshqarish va ritmdan chiqib ketmaslik juda muhim hisoblanadi. Qolaversa, har bir raqibni o'z o'yin ruhiyatimizga tushirsak, o'zimiz xohlagan futbolni namoyish eta olamiz. 

- Bugungi o'yinga 5 balli tizimda necha baho qo'ygan bo'lardingiz?

- Keling, minus to'rt deya qolaman. Birinchi taymning o'zidayoq bir nechta futbolchimiz o'yindan chiqib qoldi. Bu ham tasir qildi.

- Toma Tabatadzening yo'qligi qanchalik o'z tasirini ko'rsatdi?

- Aslida o'yin uslubimiz bo'ydor futbolchilardan foydalanib havodan to'p uzatishlar orqali gol urishga qaratilgan. Balki Tabatadze bo'lganida g'alaba qozongan bo'larmidik, to'g'risi uning yo'qligi bilindi. Dominik Begich ham zo'r o'ynadi, gol urdi, jamoa foydasi uchun ancha mehnat qildi. Lekin markaziy hujumchi sifatida Tabatadzening yo'qligi sezildi.