"Al Hilol" safida bugun legionerlar maydonga tushmaydimi?

"Temiryo'lchilar" Saudiya Arabistonining eng kuchli jamoalaridan biri "Al Hilol"ga qarshi to'p tepishadi. O'yinga bo'lgan qiziqish juda yuqori. CHiptalar sotuvi ham joyida.

Kecha ikkala jamoa o'yinoldi rasmiy mashg'ulot o'tkazdi. Jamoalar bir soatdan shug'ullanishdi. Bugun katta ehtimol bilan "Al Hilol"ning ikki legioneri Tyago Neves bilan Digao maydonga tusha olmaydi. CHunki har ikkala o'yinchi ham kechagi mashg'ulotda alohida shug'ullandi. Qolaversa, Tyago Nevesda qandaydir og'riq bordek ko'rindi.

"Al Hilol"ning greciyalik hujumchisi Georgios Samaras jarohati tufayli Toshkentga kelmagan. 8ta o'yinga diskvalifikaciya qilingan Nosir Al SHamroni masalasi esa hamon ochiqligicha qolmoqda. "Lokomotiv" tarkibida esa birgina yo'qotish bor. Sariq kartochkalari soni ikkitaga etgani uchun Islom To'xtaxo'jaev bugungi o'yinni o'tkazib yuboradi. Qolgan barcha sog'-salomat va o'yinga tayyor.

"Al Hilol"ni shu paytgacha Toshkentda hech kim mag'lubiyatga uchrata olmagan. Jamoa o'tgan yil "Bunyodkor" bilan o'yinda 1:0 hisobida g'alaba qozongan. SHuningdek, 2007 va 2009 yillarda "Paxtakor" bilan ikki marta bahs olib borib, birinchi uchrashuvda 2:0 hisobida zafar quchgan, keyingi safar 1:1 hisobida durang qayd etgan.

"Al Hilol" O'zbekistonga ilk bor 2006 yil tashrif buyurgan. Qarshida "Mashal" bilan o'tkazilgan bahsda ular 1:2 hisobida mag'lub bo'lishgan. Umid qilamizki, "Lokomotiv" Toshkentda "Al Hilol"ni mag'lub etgan birinchi jamoa sifatida tarixga kiradi. Buning uchun jamoamizda imkoniyat ham, kuch ham etarli.

O'yinga kelishni xohlovchi jurnalistlar uchun yana bir bor eslatib o'tiramiz. Agar Siz elektron pochtamizga "Media ticket" uchun xat yubormagan bo'lsangiz, darhol yuboring. SHunda o'yin paytida bemalol media tribunada o'tirib ishlash imkoniga ega bo'lasiz. Elektron pochta: [email protected]