Ahtam Nazarov: "Nasaf" - "Andijon"? Maydonda kim kuchli bo'lsa, o'sha jamoa yutadi"

— Dushanbeda ekanligimda "Andijon"dan taklif borligi haqida aytishdi. Bir muncha o'ylab klub bosh direktori Ulug'bek Mirzaev bilan barchasini gaplashdik. Rozilik bildirdim. "Andijon" o'z tarixiga ega klub, qolaversa, O'zbekiston chempionati darajasi ham yaxshi. Taassurotlarim alo. Yangi jamoa, futbolchilar munosib qarshi olishdi. Ularga rahmat aytaman. O'z oila azolaridek qabul qilishdi, deya olaman. Turkiya yig'ini yakunlandi. Endilikda rasmiy bahslarga yanada jiddiy hozirlik ko'ramiz. 

— Har bir chempionat o'ziga yarasha jozibali. To'g'ri Tojikistonda "Istiqlol" doimiy ravishda etakchilik qilib keladi. SHunga qaramay "Istiqlol"ga oson bo'lmaydi. O'zbekiston haqida eshitganman, jamoalarga qarshi o'rtoqlik o'yinlarida qatnashganman. Deylik "Navbahor", "So'g'diyona"ga qarshi maydonga chiqdik. Lekin eshitish boshqa, ko'z bilan ko'rib to'p tepish boshqa. O'zbekistonda o'zimni yolg'iz his qilmayman. Rustam Soirov, Zoir Jo'raboev, Muhammadjon Rahimov, Davron Ergashev, Nikola Stoshich, Oleksey Larin, Andrey Mishenko singari sobiq jamoadoshlarim bor. Ular bilan gaplashib turamiz. "Andijon"dagi ahil kollektiv sabab ham hali sog'inishga ulgurmadim. 

— "Nasaf" bilan o'yinga kelsak, ekspertlar ko'pincha turli taxminlarni bildirishadi. "Nasaf" OCHLda o'ynadi, yaxshi jamoa. Lekin ular kuchli yoki biz kuchsiz demagan bo'lardim. Maydon tekis, to'p dumaloq. Aynan maydonda kim zo'r bo'lsa, o'sha yutadi.  

— Aleksandr Xomyakovning ishonchini his qilyapman. CHunki aynan murabbiy menga qiziqqani haqida aytishdi. Rahbariyat va murabbiylar shtabiga minnatdorchilik bildiraman. Legioner sifatida katta masuliyat turibdi. Umid qilamanki, hammasi joyida bo'ladi.  Joriy yilgi Superligaga kelsak, yuqori o'rinlar uchun kurashadigan jamoalar ko'pchilikni tashkil qiladi. "Andijon" qaysi o'rinni egallaydi? Biz ham harakat qilamiz. Muhimi jamoa o'ziga ishonishi kerak. Futbolda oldindan biror narsa ayta olmaysiz. 

Abdulaziz Iskandarov