Abror Qodirov: “Yunayted”ni musobaqadan tashqarida deb hisoblashga shoshmang

Abror Qodirov.

"Bavariya" - "Manchester Yunatyed"

Butun futbol jamoatchiligi, bukmeykerlar, mutaxassislar, jurnalistlar bugun tunda “Bavariya” ortqicha qiyinchiliksiz yarim final masalasini hal qilishini taxmin qilyapti. Men nemislarni hozirdan yarim finalchi qilib qo'yishga shoshmagan bo'lardim. “Yunayted”ning g'alabasini to'liq ishonyapman desam oshirib yuborgan bo'laman. Unchalikmas. Lekin manchesterliklar mutlaqo ilojsiz  qolgan deb hisoblamayman.

“Alyanc Arena”dagi o'yin taqdirini osonlik bilan bashorat qilishdan oldin eslaylik, qura natijalari malum qilinganida hamma MYUga rahm shafqat ko'zlari bilan boqqandi. O'sha ondayoq “qizil iblislar”ni musobaqadan tashqari deb hisoblashga shoshilishgandi.

“Old Trafford”dagi o'yinda gollar yomg'iri kutilgandi. Ko'pchilik tomonidan. O'yin esa boshqacha kechdi va “Yunayted” hatto g'alaba qozonishi ham hech gap emasdi. Uelbekning hisobga olinmagan goli-yu, yuz foizlik vaziyatni golga aylantirolmay qolganini eslang... Bu CHempionlar Ligasi. CHorak finalgacha raqobatbardosh bo'lmagan jamoa etib kelmaydi.

MYU Germaniyada muvaffaqiyatli o'yin namoyish etadi. U olmon o'lkasida o'tkazgan so'nggi uch o'yinida g'alaba qozondi. “Bavariya” esa APL jamoalari bilan o'z uyida ko'p ham omadli o'yin ko'rsatavermaydi. “Arsenal” bilan o'yinni eslang.

So'nggi yigirma yillikdagi eng yomon mavsumini o'tkazayotgan “Manchester Yunayted” so'nggi bir oyda o'zini ancha tiklab oldi va hozir tarkibdagi muammolarga qaramay ancha sermahsul va kambinacion o'yin namoyish etyapti. APLdagi so'nggi ikki o'yinda “Nyukasl” va “Aston Villa” darvozalariga to'rttadan gol kiritgani bu so'zlar isboti. “Bavariya” esa barcha musobaqalardagi so'nggi uch o'yinda g'alaba nimaligini bilmayapti.

Ha, Mataning CHempionlar Ligasi doirasidagi o'yinlarda “iblislar”ga yordam bera olmasligi juda katta yo'qotish. Zero u hozir ajoyib formada. Biroq Runining bugungi o'yinda ishtirok eta olishi katta plyus. Fellaynining Myunxenga jamoa bilan uchmagani ham ;).

Xullas “Manchester Yunayted” butlaqo boshi berk ko'chaga kirib qoldi, deb hisoblamayman. Bugun “Yunayted” o'z vaziyatlaridan foydalansa, va o'z maydonidagi kabi tartibli himoyalansa “Bavariya” to'sig'idan o'tishi mumkin.

Mezbonlar favorit ekani va barcha jihatlarda inglizlardan ustunligini inkor etmayman. Faqat o'taketgan noadekvat buni tan olmaydi. Ammo Runi aytganidek, futbolda har doim ham favorit g'alaba qozonavermaydi.


“Atletiko” – “Barselona”

Ochig'i, ushbu menga Diego Simone jamoasi juda yoqyapti. U “Barselona” va “Real” kabi klublardek moliyaviy imkoniyatlarga ega emas. Bu borada ularning yaqiniga ham kela olmaydi. Tarkibga jahon darajasidagi yulduzlarni ham taklif qilmagan. CHeklangan imkoniyatlar bilan Ispaniya chempionatida peshqadam, CHempionlar Ligasida esa hamon kurashni davom ettiryapti.

Raqib maydonida o'yinning katta qismida o'zining asosiy yulduzi Diego Kostasiz o'ynab ham durang natija qayd etib qaytgani hurmatga loyiq! Tajriba, ijrochilar mahorati kabi omillarda “Barselona” ustun. Lekin Atletikoda harakter bor. Ularda shijoat bor. Bu mavsumda Tata Martino shogirdlari “Atletiko”ni biror marta ham mag'lub qilmaganini ham unutmaslik kerak.

Eng asosiy ikki futbolchi – Diego Kosta va Arda Turanning o'ynamasligi sezilmay qolmaydi (Kosta maydonga tushishi ham mumkin). “Barsa”dagi asosiy yo'qotish esa – Valdes.

Menga o'yin qo'shimcha vaqtgacha boradigandek tuyulyapti. Asosiysi tomoshabop o'yin ko'rsak bo'lgani. Keyingi bosqichda bu ikki jamoadan birini ko'rmasligimiz alamli xolos.