Abduqahhor Xojiakbarov: "Olmaliq"ning Turkiyadagi yig'ini ancha sermahsul o'tdi"

- Antaliyadagi yig'indagi sharoitlar, o'rtoqlik o'yinlari haqida fikrlaringizni bildirsangiz.
- 12 yanvardan Turkiyaning Antaliya shahrida dastlabki xorijiy yig'inni o'tkazdik. U erdagi sharoitlar ajoyib edi. Mashg'ulot maydonlari va stadionlarniku aytmasa ham bo'ladi, shunchaki super.

Amaliy va nazariy mashg'ulotlar bilan birga o'rtoqlik uchrashuvlari ham o'tkazildi. Dastlab Qozog'istonning "Akjayik" klubi bilan o'ynadik. Qiziqarli kechgan uchrashuvda jamoamiz 3:0 hisobida g'alaba qozondi.

Ikkinchi bahs Rossiyaning "Sibir" klubiga qarshi o'tkazildi. Bu safar ham raqib darvozasiga javobsiz 3ta gol urdik.

Yig'inni esa Ukrainaning "Karpati" klubiga qarshi o'yin bilan tugatdik. Bu uchrashuvda 1:3 hisobida imkoniyat boy berildi. Ammo mavsumoldi o'rtoqlik o'yinlarida natija birinchi o'rinda bo'lmaydi. Asosiysi futbolchilarning jismoniy holatini o'sib borishi va mavsumga yaxshi formada kirib borish. Murabbiylar har bir o'yindan keyin kamchiliklarimizni ko'rsatib berishdi, yigitlar kerakli xulosalarni chiqarishdi. Umuman olganda "Olmaliq"ning Turkiyadagi yig'ini ancha sermahsul o'tdi deya olaman.

- Viktor Kumikovning g'oyalarini futbolchilar tushunib borishayaptimi?
- Albatta, yangi murabbiy kelgach taktika ham o'zgaradi. Kumikov o'z fikrlari, g'oyalarini futbolchilarga singdirishga urinmoqda. Yig'inlar bunda katta foyda bermoqda. Nazariy mashg'ulotlarda ham ko'p yangiliklar bo'lmoqda.

- Keyingi rejalar qanday?
- 26 yanvar kuni Toshkentga qaytib keldik. Endi 30 yanvarda yana xorijiy yig'inni o'tkazish uchun Antaliya shahriga uchib ketamiz. U erda mavsumga tayyorgarlikning final bosqichi olib boriladi.

Narzulla Saydullaev