3-turning, ikkita o'yinida imkoniyatlar qanday?

So'g'diyona (Jizzax) – Lokomotiv (Toshkent)
Hakamlar: R. Bobomurodov (Navoiy), R. Samandarov (Navoiy), O. Jumaev (Navoiy), F. Norsafarov (Qarshi)
Nazoratchi: A. Popov (Toshkent).

Yangierda oliy liga o'yinlari bo'lmaganiga, o-xoooo necha yillar bo'lib ketdi. Bir paytlar bu hududda kimlar to'p tepmagan deysiz. Mana bugun mahalliy muxlislar O'zbekiston milliy terma jamoasining aksar futbolchilari to'p tepadigan "Lokomotiv" hamda oliy ligada qolish uchun kurash olib borayotgan "So'g'diyona" jamoasiga qarshi bahs olib boradi.



Turnir jadvaliga qarasa "Lokomotiv" jizzaxliklardan bor yo'g'i ikki ochkoga oldinda, lekin tajriba va saviya jihatidan bunday demagan bo'lardik. Bu o'yinda "Loko"ning g'alaba qozonish imkoniyati juda yuqori, faqatgina terma jamoadagi o'yin o'tkazgan futbolchilar maydonga tushmasalar kerak, ammo bu klub uchun muammo emas, jamoaning zaxira o'rindig'i ancha uzun. Aksincha "So'g'diyona"dagi muammolar bartaraf etilayotgani yo'q, aynan shu holat jamoaning o'yiniga jiddiy tasir o'tkazyapti. SHundan kelib chiqqan holda, bugungi o'yindagi imkoniyatlar "Lokomotiv"da ancha yaxshi, 60/40.

Imkoniyatlar: 40/60%


Paxtakor (Toshkent) – Buxoro (Buxoro)
Hakamlar: M. Muxamedov (Toshkent vil.), T. Gaynulin (Toshkent), S. SHoyusupov, (Toshkent), D. Muxtorov (Toshkent)
Nazoratchi: R. Serazetdinov (Toshkent).

"Buxoro" o'z maydonida bo'lib o'tgan o'yinda g'alaba qozona olmagach, ko'pchilik Mochinovdan qoniqish hosil qilmayotganligini aytib o'tdi. Mochinov esa "men himoyaviy futbolni bilmayman, futbolni hujum qilib o'ynaydilar", deb takidladi. Agar u bugungi o'yinda ham shu falsafada maydonga tushsa jamoasiga juda qiyin bo'ladi. Odatda "Paxtakor" birinchi bo'limda gol ura olmasa, o'yinda rosa qiynaladi. Aksincha, o'yinning dastlabki 20 daqiqasi ichida gol ursa o'yinni yirik hisobga olib kelishi mumkin. "Paxtakor"ga qarshi bu himoya bilan ochiq futbol namoyish etish "Buxoro"ga qimmatga tushishi mumkin, yana ham buni o'yinda ko'ramiz.



"Paxtakor"dagi bugungi muammo ruhiyat bilan bog'liq. Jamoaning 5 nafar futbolchisi Bangladeshda bo'lib o'tgan turnirda muvaffaqiyatsizlikka uchradi, MTJda esa bir nafari yirik mag'lubiyat bilan ortga qaytdi. Kaxi Maxaradze esa Malta va Germaniya terma jamoalariga qarshi rostakam futbol o'ynab qaytdi. Jamoa jismoniy jihatdan to'liq kuchga ega emasligidan "Buxoro" foydalana oladimi yoki yo'q, buni bugun bilamiz.

Imkoniyatlar: 55/45%