- Ўзингиз кўрдингиз, осон бўлгани йўқ. "Ғазалкент" жамоасини ёшлар деймизу, лекин бу ёшлар жуда иқтидорли. Биринчи бўлимда жуда қийналдик. Улар бизга анча қийинчилик туғдиришди ёки йигитлар бу рақибга етарлича баҳо беришмади. Иккинчи бўлимда ўзимизга келиб олдик ва икки гол уриб, ғалабага эришдик. "Каттақўрғон" жамоаси мухлислари, футболчилари, мураббийлари ва раҳбариятини ушбу ғалаба билан табриклайман.
- Ўтган турдаги кутилмаган мағлубиятдан кейин футболчиларни руҳлантириш қандай кечди?
- Ўйинни тезроқ унутишга ҳаракат қилдик. Апрель ойида бизни 6та ўйин кутиб турибди. Шу сабабли ўтган ўйинни тезроқ эсдан чиқариш муҳим. Олдинги ўйинни кўриб чиқдик. Суперлигада тажрибаси бор футболчилар кўп. Рақибда бир-икки вазиятдан кўпроқ имконият бўлмади. Статистикани кўрдим, улар бирор марта бурчак зарбасига ҳам эга бўлмаган экан. Бу футбол. Бизда жамоа янги. Энди биринчи йил. Таркибга келган 20 футболчи 20 жамоадан келган. Гарчи Суперлигада кўп ўйнаган бўлса ҳам биринчи йилдаёқ жамоани бирлаштириш осон кечмайди. Буни биринчи тайм кўрсатиб берди.
- Кейинги ўйин "Арал"га қарши бўлади. Сизлар мезбонсизлар. Ўйин қаерда бўлади?
- Кейинги ўйин учун Самарқанддаги стадион тайёр бўлади. Пролиганинг етакчиси "Арал" билан ўйинни Самарқандда ўтказамиз.
- Захирадан майдонга тушган Иззатилло Абдулҳақов гол урди ва голли пас амалга оширди. Уни ўйиннинг энг яхши футболчиси десак бўладими?
- Бўлади. У ўйин тақдирини ҳал қилган голни урди ва голли пас берди. Абдулҳақовни "Андижон"даги фаолиятидан биламан. Ёшлар жамоасидан асосийга биз олгандик. У жамоага кеч келиб қўшилди. Чемпионат бошланишига бир кун қолганда уни рўйхатдан ўтказгандик. Уни секин-секин жамоага қўшиб борамиз. У яхши футболчи.
- Тажрибали футболчи Илдар Маматказинни кўпчилик ҳисобдан чиқарганди. У бугун яхши ўйин намойиш этди.
- У ҳам жамоага кеч келди. Жамоанинг қишки йиғинларини ўтказиб юборди. Уни ўз даражасига келтириш учун бизга вақт керак. Ўтган ўйинларда у захирада қолган бўлса, бугун у асосий таркибда майдонга тушди ва у ўзини оқлади. Илдар - тажрибали ҳимоячи. У кубокни ютган, жамоасини Пролигадан Суперлигага олиб чиққан етакчи футболчи. Бугун у яхши ўйин ўтказди.
- "Ғазалкент" жамоасидан кимни алоҳида ажратиб кўрсатган бўлардингиз?
- Қишда ушбу жамоа билан ўйнагандик. Ўшанда ўйин осон бўлганди. Уларда ҳали тайёргарлик жараёни эди. Шу боисдан бўлса керакдир, йигитларим яхши баҳо беришмаган. Энди "Ғазалкент" жамоасининг таркибини билмайман-ку, ярмидан кўпи терма жамоалар футболчилари бўлса керак. Тахлил қилганимизда 14-рақам, 11-рақам, 16-рақамдаги футболчиларидан катта футболчи бўлишларини кутяпман. Қизил карточка олган ҳимоячиси бизга қарши ўйнамагани ҳам яхши ҳолат бўлди. Бу жамоа мазмунли ўйин кўрсатмоқда. Ёш бўлса ҳам олдинга тепа-теп йўқ. Таркибидаги кўп футболчиларининг келажаги порлоқ.
- Жамоа биринчи бўлимда кўпроқ ҳимояда ўйнади. Иккинчи бўлимни эса ҳужумда ўтказди. Бу режада бормиди?
- Ҳа, режада бор эди. Биринчи бўлимда ўз ўйин услубимизни бошқачароқ қилгандик ва бу иш бермади. Иккинчи бўлимда эса ўйинни ўзгартирдик ва бу иш берди. Шу орқали гол урдик ва ўйинни ютиб кетдик. Иккинчи бўлимда ўйин услубимизни ўзгартирдик.
- "Ғазалкент"да ҳам бир қанча яхши вазиятлар юзага келди. Нима деб ўйлайсиз, рақибларингиздан қанчалик омад юз ўгирди?
- Омад кучлиларга кулиб боқади. Биринчи бўлимда улар иккита гол уришлари мумкин эди. Лекин ура олишмади. Иккинчи бўлимда эса биз урдик ва ютиб кетдик.
