Аввалроқ Мбаппе Орельен Тчуаменининг ютуб-каналига берган интервьюсида майдондаги энг осон позиция марказий ҳимоячи эканлигини, бу ерда ҳатто 40 ёшли футболчилар ҳам бемалол ўйнаши мумкинлигини ҳазил аралаш айтган эди.
"Ҳужумчилар кўпинча шундай дейишади. Лекин ҳимояда ҳаммаси бошқача. Бир марта хато қилсанг — дарров жазоланасан, шунинг учун бу энг осон позиция эмас.
Тўғри, ҳимоячилар камроқ югуриши мумкин, лекин ўйиндан кейин бошинг қаттиқ оғрийди. Чунки ҳужумчи ўйин давомида 10 марта хато қилиши мумкин ва бу ҳеч нарсани ўзгартирмайди, ҳимоячида эса бундай имконият йўқ. Агар яккакурашда ютқазсанг, рақиб гол уриши ва ҳаммаси тугаши мумкин. Килиан буни билади. Нима учун бундай деганини тушунмадим, у билан бу ҳақда гаплашиб оламан (кулади).
Умуман олганда, қайсидир позицияни бошқасидан осонроқ деб бўлмайди. Майдондаги ҳар бир чизиқ жуда муҳим", — деди Умтити "L’After Foot" нашрига берган интервьюсида.
