Суперлигада тоза ўйин вақти ошди

Март ойидан эътиборан ўйин вақтини сунъий чўзишга ҳаракат қилаётган футболчи, расмий ёки клуб жаримага тортилмоқда.

Ярим мавсум давомида Суперлиганинг 29 нафар футболчиси ўйин вақтини чўзгани учун жарима тўлади. Бундай футболчилар "Сурхон"да 5 ва "Андижон"да 4 нафарни ташкил этади. Чемпионлик учун кураш олиб бораётган "Насаф", "Нефтчи", "Сўғдиёна", шунингдек, "Олимпик" футболчилари 3 мартадан вақт чўзгани учун огоҳлантирилган.

Миржалол Қосимов ва Вадим Абрамов устозлик қилаётган ОКМК ҳамда "Динамо" футболчилари бу борада қолганларга ўрнак бўлганини қайд этиш керак. Ортда қолган 13 та тур давомида уларнинг бирорта футболчиси вақт чўзгани учун огоҳлантирилмаган.

Фейр плей қоидасига бўлган интилиш тоза ўйин вақти борасидаги статистикага ижобий таъсир кўрсатган. Қуйидаги инфографикада 2023 йилги тўлиқ мавсум ҳамда 2024 йилги ярим йиллик хулосаси акс этган. Фақатгина "Насаф" клубини инобатга олмаса, қолган барча клуб ўз ҳолатини яхшилаган.