Саид Бузамбу: "24 йил деганда мундиалда қатнашиш бахтига мушарраф бўлдик"

"Бугун қийин ўйин ўтказдик, сабаби футзал оламида ўз ўрнига эга Украинага қарши майдонга тушгандик. Улар Европанинг энг кучли жамоаларидан бири саналади, қолаверса, рақиб жамоада тажрибали, индивидуал хислатларга эга футзалчилар бисёр. Бизда эса профессионаллик уларнинг даражасидек эмас. Ўйин давомида бирга-бир вазиятлардан фойдалана олмадик. Рақиб жамоанинг тажрибаси ўз сўзини айтди. Украина ғалабага лойиқ эди. 

Ҳар қандай футзалчи учун жаҳон чемпионатида иштирок этиш катта орзу саналади. Айниқса, биз учун. Сабаби 24 йил деганда мундиалда қатнашиш бахтига мушарраф бўлдик. Бошқа орзуларимиз ҳам бор эди, жумладан, дунёнинг энг кучли саккиз жамоаси орасида бўлишни хоҳлагандик. Афсуски, бу амалга ошмади. Ҳозир жуда тушкун кайфиятдамиз. Аммо эртадан хатоларимизни кўриб чиқиб, кейинги турнирларга тайёргарликни бошлаймиз. Умуман олганда, жаҳон чемпионати яхши ташкиллаштирилибди. Мундиал ўз маҳоратинингизни кўрсатиш имконини берадиган энг йирик мусобақа ҳисобланади", деди Нидерландиянинг ягона голи муаллифи.

Эслатиб ўтамиз, Нидерландия "А" гуруҳида иштирокини бошлаб, 2-ўрин билан 1/8 финал йўлланмасини қўлга киритганди.

Оқил Абдубарноев суҳбатлашди.