Ўзбекистон терма жамоаси Хитойга жўнаб кетди

Миллий терма жамоа делегация аъзолари айни дамда Пекинга етиб борди ва тушдан кейин машғулотларга киришади. Хабарингиз бор, Қосимов шогирдлари 6 июнь куни Хитойнинг Хаххот шаҳрида Хитой миллий терма жамоасига қарши ўртоқлик учрашувида майдонга тушади. 8 июнь куни эса, Ўзбекистон миллий терма жамоаси Пекиндан Жанубий Корея пойхтахти Сеул шаҳрига учиб кетади. Эслатиб ўтамиз, Ўзбекистон 11 июнь куни Сеулда ЖЧ-2014 саралаши 9-тури доирасида Жанубий Корея терма жамоасига қарши ўйнайди.

Таъкидлаш жоиз, Қосимов Хитой ва Жанубий Корея терма жамоаларига қарши ўйинлар олдидан терма жамоага жами 23 нафар футболчини жалб этган. Жанубий Кореяга қарши учрашув якунига етгач, миллий терма жамоа делегацияси 12 июнь куни Тошкентга қайтади.

Маълумот ўрнида, айни дамда саралашнинг «А» гуруҳида 11 очко билан пешқадамлик қилаётган Ўзбекистон миллий терма жамоаси 18 июнь куни Тошкентда саралашнинг сўнгги турида Қатар терма жамоасини қабул қилади.

Эслатиб ўтамиз, 4 июнь куни «А» гуруҳида 8-тур учрашувлари ўтказилади ва унда Жанубий Корея терма жамоаси Ливанга қарши сафар учрашувини ўтказса, Қатар ўз майдонида Эрон терма жамоасини қабул қилади. Ўзбекистон миллий терма жамоаси мазкур турда дам олади.

4 июнь. ЖЧ-2014 саралаш. 8-тур.
«А» гуруҳи
Қатар - Эрон
Ливан - Жанубий Корея