Сўнгги ўйинларда мағлубиятлар "гирдоби"га тушиб қолган "Нефтчи" ўз майдонида "Олимпик"ни қабул қилса, "Металлург" Тошкентга "Бунёдкор" майдонига сафар уюштиради. Бошланажак тур олдидан мутахассис фикрига қулоқ тутиш мақсадида собиқ футболчи Абдумажид Тоировга юзландик.
— Фарғона шаҳри клуби яхши таркибга эга ва жадвалдаги ҳозирги эгаллаб турган ўрни вақтинчалик. Жамоага қандайдир ҳамжиҳатлик етишмаётгандек. Балки сабаби ички муҳитдадир. "Олимпик" билан ўйинда ғалаба қозониш учун маҳоратнинг ўзи камлик қилади. Тактик жиҳатдан идеал ўйин кўрсатиш керак. Чунки Тимур Кападзенинг жамоаси тезкор ўйин намойиш қилади. Тактик жиҳатдан анча рақибларни қийнаб қўймоқда. Бугун яхши ва сифатли футбол кўрамиз. Тахминимча, ўйин дуранг натижа билан якунланади.
— "Бунёдкор" жамоаси бугунги кунда ўйин томондан ҳам, жадвалда ҳам "Металлург"дан олдинда ҳисобланади. Баҳс Тошкентда бўлишини ҳам инобатга олсак майдон эгалари ғалаба қозонишини тахмин қилишим мумкин.
— Мазкур тўқнашувда "Қизилқум" номинал мезбон бўлишига қарамай Олмалиқда тўп тепади. Демак ўз-ўзидан устунлик АГМК томонида. Ўйин томонлама ҳам Миржалол Қосимов шогирдлари рақибидан бир бош баландроқ. АГМК аввалги турда ўз майдонида "Сўғдиёна"ни енгди. "Пахтакор"га муносиб қаршилик кўрсатиб ҳақли бир очко ишлади.
— "Темирйўлчилар" охирги икки ўйиндаги ғалабадан сўнг айни пайтда яхши кайфиятда. Фикримча, "Қўқон-1912" билан баҳсда ғалабали сериясини давом эттиради. Бир нарсани айтиш жоиз, Бахтиёр Ашурматов бошчилик қилаётган жамоа осонликча ютқазмайди. Улар "Насаф", "Сурхон"га қарши сифатли футбол кўрсатди. Фақат омад етишмаяпти.
— Самарқандликлар сўнгги икки учрашувда дуранг натижа қайд этди. Бу сафарги рақиб эса — "Навбаҳор". Қайсидир маънода "Динамо"га охирги учрашувлардаги тактикаси иш бериши мумкин. Бироқ ўз мухлислари олдида барибир ҳужум қилиши керак бўлади. Бунга "Навбаҳор" имкон берармикан? Нима бўлганда ҳам стадионга келган мухлислар ажойиб футбол гувоҳига айланишади. Якунда "Навбаҳор" ғалабада қозонади, деб ўйлайман.
— Бу ўйинда устунлик "Пахтакор"да. "Сурхон" кучли ирода, тўғри танланган тактика ва жамоавий бирлик эвазига "шерлар"дан очко олиши мумкин.
— Турнинг марказий ўйини. Икки хил услубдаги жамоалар тўқнашуви. "Сўғдиёна"нинг тезкор қарши ҳужумлар, вертикал футбол, ҳимоядаги ақлли ҳаракатлар ва сабр билан вазиятни кутиш устига қурилган. "Насаф" эса тўпни назорат қилади, майдонда биринчи рақамли жамоага айланади. Уларда позицион ҳужумлар ва ўйланган паслар бор. Икки жамоага ҳам омад ва томошабоб футбол кўрсатишни тилаб қоламан.
