"Насаф" - "Сўғдиёна" баҳси бир кун олдинга кўчирилди, чемпионларга кубок ҳам ўша куни топширилади

ЎФА миллий терма жамоанинг Қатарга сафаридан келиб чиқиб, 24-турнинг икки учрашувини 9 ноябрь куни ўтказиш таклифини илгари сурганди. Мазкур таклифга "Пахтакор" розилик билдирди ва унинг "Навбаҳор" билан ўйини 9 ноябрда ўтадиган бўлди.

"Насаф" эса Чемпионлар лигасида 6 ноябрь куни ўйини борлигидан келиб чиқиб, бу таклифга рози бўлмаганди. Бироқ қаршиликлар бир тур аввал "Локомотив" устидан зафар қучиб, мамлакат чемпионлигини муддатидан олдин қўлга киритди. Мазкур ҳолат ҳамда "Насаф" клубининг Қатарга учиб кетиши керак бўлган футболчиларининг кубок топшириш маросимида бемалол иштирок этишини инобатга олиб, қаршиликлар 24-тур беллашувини 9 ноябрда ўтказиш таклифини киритди. Бу ҳам миллий терма жамоа учун фойдали эканлиги, ҳам кубок топшириш маросимида терма аъзоларига қулайлик тақдим этишидан келиб чиқиб, Лига "Насаф" сўровини қаноатлантиришга қарор қилди.

Шу тариқа Суперлига 24-туридан ўрин олган "Насаф" — "Сўғдиёна" учрашуви 9 ноябрь куни 17:00 да старт оладиган бўлди. Учрашувдан кейин мамлакатнинг янги чемпионига кубок топшириш маросими ўтказилади.