"Насаф" ҳимоячиси Алибек Давронов қаерда?!

Чемпионлик учун жиддий кураш олиб бораётган жамоалардан бири "Насаф" таркибида 2 турдан бери марказий ҳимоячи Алибек Давронов кўриниш бермаяпти. 21 ёшли футболчи охирги марта 10-тур доирасида "Локомотив"га қарши кечган Қаршидаги ўйин (3:0)ни тўлиқ ўтказган эди. Шундан кейин "Сўғдиёна" (0:1) ва "Нефтчи" (1:0)га қарши беллашувларда қайдномадан ҳам ўрин олмади.

Хўш, Давронов қаерда? "Championat.asia" олган маълумотларга кўра, Алибек шу кунларда Туркияда бўлиб турибди. Футболчи U-23 Осиё кубоги олдидан ҳам тўпиғидан жароҳат олган эди. Бугун Туркияда унинг жароҳатига сўнгги ташхис қўйилиши кутилмоқда. Айнан бугунги ташхисларга қараб ҳимоячининг яқин тақдири маълум бўлади. Алибекнинг Тимур Кападзе бошчилигидаги U-23 терма жамоамиз билан Париж олимпиадасида иштирок этиш ёки этмаслиги ҳам айнан Туркиядаги тиббий текширувлардан кейин маълум бўлади.

Эслатиб ўтамиз, Алибек Давронов жорий мавсум жароҳатлар сабаб Суперлигада бор йўғи 6та ўйин (1та гол) ўтказди, ОЧЛда эса 3та учрашувда майдонга тушди.

Ўзбекистон чемпионати турнир жадвали >>>>> СУПЕРЛИГА