"Насаф" футбол клуби ишқибозлари Тошкентга жўнаб кетишди

Ишқибозлар клуби фаоллари эрта тонгдан Қарши шаҳридаги Марказий стадион ёнида тўпланишди ва улар ўзлари учун ажратилган автобусга жойлашишиб, Тошкент сари йўлга чиқишди.

"Бугунги бўладиган учрашув "Насаф" футбол клуби ишқибозларида жуда катта қизиқиш ўйғотган, бизларда кейинги пайтларда ўз жамоаламизга бўлган ишонч ва яқинлик янада кучайди. Биз бугун бевосита "Пахтакор" Марказий стадионида туриб, севимли бош мураббийимиз Рўзиқул Бердиев бошчилигидаги жамоамизни учрашув давомида қизғин қўллаб турамиз. Ишқибозлар клуби фаолларидан ташқари кеча кечки пайт ва бугун эрталаб жуда кўп сонли мухлислар Тошкент шаҳрига жўнаб кетишди. Кимлардир шахсий машинасида, кимлардир поездда ва яна кимлардир ҳаво йўли орқали. Умид қиламизки, бизнинг сафимизга ҳозирги пайтда Тошкент шаҳрида бўлиб туришган бошқа ишқибозлар ҳам қўшилишади. Ҳа, бугун катта ва чиройли футбол ўйинидан баҳраманд бўлсак ажаб эмас. Биз жамоамиз томонидан "қора анъана"га чек қўйилишидан умид қилаяпмиз. Зеро, бугунги кунда жамоамиз бу вазифани уддалай олади, биз ишқибозлар бунга ишонамиз",- дейди ишқибозлар клуби фаолларидан бири Зиёдулла Сафаров.

Биз ҳам сайтимиз номидан "Насаф" футбол жамоасига ва унинг мана шундай жонкуяр ва содиқ мухлисларига муваффақиятлар тилаб қоламиз. Олға "аждарлар"!