Бу ҳақда "La Nación" нашри хабар берди. Маълумотларга кўра, Аргентина футбол ассоциацияси (AFA) клуб раҳбарияти билан бир неча ой давомида ёмонлашиб келган муносабатлар ортидан 80 мингдан ортиқ томошабинни сиғдира оладиган стадион хизматларидан фойдаланмасликка қарор қилган.
Томонлар ўртасидаги муносабатлар 6 октябрь куни Лионель Мессининг терма жамоа билан хайрлашув маросимидан кейин янада кескинлашган. Тадбир давомида ташкилий муаммолар юзага келган: стадионда катта экран ва мусиқий чиқишлар учун саҳна бўлмаган.
Тадбир ташкилотчиси Marketing Sports клубни турли чекловлар қўйганликда, жумладан, санъаткорлар чиқиши вақтида электр таъминотини узиб қўйганликда айблаган. "Ривер Плейт" эса бу эътирозларни рад этган. Клуб вакиллари экранни олиб ташлаш ҳақида олдиндан огоҳлантирилганини, ташкилотчилар эса тадбирдан бир кун олдингина ишчи учрашув ўтказганини билдирган.
Можаронинг яна бир сабаби — AFA президенти Клаудио Тапиянинг Мессига ҳурмат кўрсатиш маросимида майдонга чиқмагани бўлган. "Ривер Плейт" президенти Стефано Ди Карло эса футболчига эсдалик совғасини ўз кабинетида топширган.
"La Nación" маълумотига кўра, AFA раҳбарияти клуб билан муносабатларни тиклаш имкони қолмаган, деб ҳисобламоқда. Аргентина терма жамоасининг янги уй стадиони сифатида реконструкциядан чиқарилган "Сьюдад-де-Ла-Плата" аренаси кўриб чиқилмоқда.
Шу билан бирга, Аргентина терма жамоасининг ўз юртидаги яқин учрашувлари қаерда ўтказилиши ҳозирча режалаштирилмаган.
