Mariya Moiseeva “Sevinch” jamoasida muvaffaqiyatli faoliyat yuritdi. U jamoamiz safida ko'plab mamlakatimizda o'tkazilgan chempionatlarda, xorijiy turnirlarda sovrindor bo'ldi. U shuningdek mamlakatimiz terma jamoasi safida ham o'ynab, o'zini mohir futbolchi ekanligi namoyish qildi.

Mariya Moiseeva bu yildan futbolni tark etishga qaror qildi va keyingi faoliyatini yoshlarga talim-tarbiya berishga bag'ishlashga qaror qildi. O'zbekiston Davlat jismoniya tarbiya institutining magistraturasini tugatgan Moisseva endilikda Toshkent axborot texnologiyalari universitetida talabalarga talim beradi.

"Sevinch" klubi qoshidagi restoranda Mariya Moiseevani kuzatish marosimi o'tkazildi. Marosimda jamoamiz bosh murabbiyi V.N.Xan Mariyaning jamoa yutuqlariga qo'shgan hissalari to'g'risida to'xtalib, uning keyingi faoliyatida ulkan zafarlar tiladi.

Shuningdek kechada klubimiz rahbari Nodir Xalilov ham ishtirok etib, Moiseevaga “Sevinch” jamoasidagi faoliyati uchun klub rahbariyati nomidan va barcha futbol ishqibozlari nomidan kattadan-katta tashakkurlar izhor etdi. Jumladan, “Jamoamizni bir oila deb bilsak, Mariya uning allaqachon to'laqonli azosiga aylandi. Uning xulqi ham o'yinchi sifatidagi faoliyati ham yosh futbolchi qizlarimizga haqiqiy o'rnak bo'ldi. Biz Mariya bilan xayrlashmaymiz balki, u doimo bizning katta oilamizning azosi sifatida qoladi va uning uchun har doim eshiklarimiz ochiq bo'ladi. Shuni ishonch bilan aytamanki, u keyingi hayotida ham xuddi jamoamizdagi kabi katta yutuqlarga erishadi.”,-deydi Nodir Xalilov.

Shundan so'ng klubimiz rahbari hamda jamoamiz bosh murabbiylari Mariya Moiseevaga esdalik sovg'alari va guldasta taqdim qilishdi.

Ushbu marosim bilan birga bugun tug'ilgan kunini nishonlayotgan Feruza Turdiboevani ham N.Xalilov va V.Xanlar qizg'in tabriklashdi. Feruzaga ham esdalik sovg'asi va guldasta topshirildi. Futbolchi qizlarimiz ham Mariya va Feruzaga o'zlarining ezgu tilaklarini bildirishdi.

Mariya Moiseeva futbolchilik faoliyatini yakunladi