Легионерларимиз қачон Тошкентга келишади?

Дастлабки кунги машғулотларда йиғинга чақирилган 7 нафар легионердан 2 нафари Одил Аҳмедов ва Санжар Шоаҳмедов иштирок этди холос. Қолган легионерлар қачон терма жамоа ихтиёрига етиб келишади? Қуйида бу саволга жавоб берамиз.

Рустам Ашурматов
"Гвангжу" клуби билан биргаликда Жанубий Корея К-лигасига йўлланмага эга чиққан Ашурматов 4 ноябрь куни Тошкентга етиб келади. Бугун, 3 ноябрь куни "Гвангжу" 35-турда ўз майдонида "Чоннам Драгонс"га қарши ўйнади ва 1:2 ҳисобида ютқазиб қўйди. 9 ноябрда "Гвангжу" чемпионатнинг сўнгги турини "Тэджон Ситизен" клубига қарши сафарда ўтказади. Клуб раҳбарияти вазифа муддатдан аввал бажарилани боис ўзбекистонлик футболчини эртароқ терма жамоа ихтиёрига қўйиб юборишга рози бўлди.

Икром Алибоев
"Сеул" бугун ўз майдонида "Ульсан Хоранг-И"ни қабул қилди ва 0:1 ҳисобида ютқазиб қўйди. Клуб навбатдаги учрашувни 23 ноябрда ўтказади. Шундай экан Алибоев ҳам эрта-индин терма жамоа таркибида машғулот ўтказиши кутилмоқда.

Отабек Шукуров
БАА про-лигасида пешқадамлик қилаётган "Шаржа" клуби 7 ноябрь куни "Ал Жазира" меҳмони бўлади. Айнан мана шу баҳсдан кейин Отабек Шукуров Ўзбекистонга қараб учади. Шукуров Қирғизистон билан баҳсга қадар Тошкентга етиб келади, аммо Абрамов унга дам берса керак.

Темурхўжа Абдухолиқов
Яқиндагина яна легионерга айланган Темурхўжа Абдухолиқов ўйнаётган "Хорфаккан" 8 ноябрь куни "Ажман" меҳмони бўлади. Ушбу учрашувдан сўнг ҳужумчимиз Тошкентга етиб келади ва Қирғизистон билан баҳсда иштирок этмайди.

Элдор Шомуродов
Бугунги кунда терма жамоамиз етакчиларидан бирига айланиб олган Элдор Шомуродов фаолият олиб бораётган "Ростов" клуби 9 ноябрь куни Россия премьер-лигаси 16-тури доирасида "Тамбов"ни қабул қилади. Кўриб турганингиздек терма жамоамиз Тошкентда Қирғизистон билан ўйнаётган пайтда Шомуродов Ростовда "Тамбов" билан ўйнаётан бўлади. Элдор катта эҳтимол билан 11 ноябрь куни терма жамоа сафида тўлиқ куч билан машғулот ўтказади.