- Ўйинни яхши бошладик. Биринчи бўлимни тўлиқ назоратимиз остида ўтказдик. Учта 100 фоизлик голли вазият яратдик, лекин улардан фойдалана олмадик.
Иккинчи бўлимда нима бўлганини билмайман. Майдонга умуман бошқа жамоа тушгандек бўлди. "Нефтчи" ўз имкониятларидан фойдаланиб, гол урди. Аслида, биринчи бўлимнинг ўзида учта гол уришимиз мумкин эди. Аммо футбол шундай ўйин. Иккинчи бўлимда нима содир бўлганини ҳозирча тушунмадим.
- Биринчи бўлимда "Пахтакор" фойдасига белгиланган пенальти ва ўйиннинг сўнгги дақиқаларида жамоангиз дарвозасига белгиланган пенальти ҳақида фикрингизни билдирсангиз.
- Биз фойдамизга белгиланган пенальти эпизодини ҳали кўрмадим. Ўйин охиридаги пенальтига келсак, бу вазиятни қандай таҳлил қилишларини билмайман. Эпизодни кўрдим, лекин у ерда рақибни итариш ёки тортиш бўлмаган, деб ўйлайман. Шунинг учун бу пенальти ҳақида аниқ бир фикр билдиришим қийин.
- Сизни бир неча марта кузатганман. Чемпионлар лигасида "Пахтакор" майдонга мутлақо бошқача мотивация билан тушади. Бугун эса биринчи бўлимда бир "Пахтакор"ни, иккинчи бўлимда эса бутунлай бошқа жамоани кўрдик. Биринчи бўлимда жамоангиз бешта голли вазият яратди. Сиз эса учта 100 фоизлик имконият бўлганини айтдингиз. Натижада битта гол урилди, у ҳам пенальтидан. Иккинчи бўлимда эса вазият бутунлай ўзгарди. Баъзи ўйинларда Суперлига рақибларини етарлича баҳоламаслик ёки мотивация етишмаслиги кузатилмаяптими? Айниқса, бугун 5–4–1 схемасида ўйнаган рақибга қарши тўрт-бешта вазият яратилди. Иккинчи бўлимда "Нефтчи" 4–1–4–1 схемасига ўтди, аммо жамоангиз таянч ярим ҳимоячи орқали ҳам бирор яққол голли вазият ярата олмади. Бу мотивация билан боғлиқми ёки вазиятлардан фойдаланишдаги муаммоми? Албатта, ҳозир бу ҳақда гапириш осон эмас, лекин жамоада нима ўзгарди?
- Билмадим. Биринчи бўлимда футболчилар майдонга мотивация билан тушишди, ҳаракат қилишди. Аммо иккинчи бўлимда нима бўлганини тушунмадим. Бу ҳақда гаплашамиз, ўйинни таҳлил қиламиз. Майдонга бутунлай бошқа жамоа тушгандек таассурот қолди. Балки футболчилар биринчи бўлимдан кейин ғалабага ишониб, бироз бўшашгандир. Аниқ айта олмайман. Биринчи бўлимда ҳақиқатан ҳам учта 100 фоизлик вазиятимиз бўлди. Ўйинни таҳлил қилиб, нима сабабдан бундай бўлганини аниқлашга ҳаракат қиламиз.
- Заид Таҳсиннинг аҳволи қандай? У Чемпионлар лигасида иштирок эта оладими?
- Ҳозирча билмайман. Уни тез ёрдам машинаси олиб кетди. Шифокорлар ҳали нима бўлганини маълум қилишмади.
- Гапларингиздан келиб чиқиб, иккинчи бўлимда жамоада нима содир бўлганини ўзингиз ҳам ҳозирча тушунмаётганингиз кўриниб турибди. Албатта, ўйинни совуққонлик билан қайта кўриб чиқиш ва таҳлил қилиш керак. Лекин эҳтимол, танаффус пайтида кийиниш хонасида футболчилар билан кўпроқ гаплашиш, уларни руҳлантириш керакмиди? "Пахтакор" бош мураббийининг ўйиндан кейин иккинчи бўлимда нима бўлганини тушунмаганини айтиши бироз ғалати эмасми? Бу мураббий вазиятни назоратдан чиқариб қўйганини англатмайдими? Ахир бош мураббий сифатида жамоадаги вазият учун сиз жавобгарсиз. Бу ҳолатга қандай изоҳ берасиз?
- Буни албатта кўриб чиқамиз. Футболчилар билан ўтириб, ҳар бир эпизодни таҳлил қиламиз ва нима бўлганини муҳокама қиламиз. Эртага йиғилиб, бу ҳақда батафсил гаплашамиз. Нима сабабдан бундай бўлганини тушуниб олишимиз керак. Биринчи бўлимда бешта голли вазият яратган бўлсак, иккинчи бўлимда ҳам шу ўйинни давом эттиришимиз керак эди. Аммо нима ўзгарганини ҳозирча билмайман. Эртага жамоа билан биргаликда ўйинни қайта кўриб чиқамиз ва таҳлил қиламиз.
- Мавсум якунланишига бешта тур қолди. "Нефтчи"ни "Навбаҳор" ва "Динамо" каби жиддий рақибларга қарши ўйинлар кутяпти. Жамоанинг кейинги учрашувларда ғалаба қозонишига қанчалик ишонасиз? Умуман, чемпионлик учун кураш ҳақида қандай фикрдасиз?
- Ҳали олдинда бешта ўйин бор. Ҳозир ҳеч ким қайси жамоа ғалаба қозонишини 100 фоиз аниқ айта олмайди. Биз охиригача курашамиз. Имкониятларимиз ҳали йўқолгани йўқ. Ҳа, вазият бироз қийинлашган бўлиши мумкин, лекин чемпионлик учун курашдан воз кечганимиз йўқ. Ҳар бир учрашувда ғалаба учун ҳаракат қиламиз ва чемпион бўлиш учун охиригача курашамиз.
