Жамшид Саидов: "Бугун маҳаллий ишқибозлар ҳам бизга мухлислик қилишди"

Ўйин ҳақида

- Қийин ўйин ўтказдик. Мухлисларимизга рахмат, бизга охиригача ишонишди ва қўллаб-қувватлашди. Биринчи давра якунини ажойиб ғалаба билан якунладик. Йигитларга характер кўрсатишгани учун миннатдорчилик билдираман. Бугунги ғалабада жамоанинг ҳар бир аъзосини алоҳида меҳнати бор. Шунингдек, таъкидлаб ўтиш керак, бугун маҳаллий ишқибозлар ҳам бизга мухлислик қилишди. Албатта, уларга ҳам жамоамиз номидан миннатдорчилик билдираман.

- Жамолиддин Убайдуллаевнинг захирага олиниши жароҳат билан боғлиқми?

- Ҳа, шундай бўлди. У рақиб футболчиси билан курашда жароҳат олди, мажбурий алмаштиришга қўл урдик. Унинг ҳолати ҳақида барчаси тиббий кўрикдан сўнг маълум бўлади.

- Европа чемпионатида Грузия терма жамоаси ажойиб ўйинлар кўрсатаяпти. Умуман чемпионатимизга келадиган грузин футболчиларнинг имкониятларини қандай баҳолайсиз?

- Жамоамизга келадиган легионер бизнинг принципларга мос тушиши керак. Грузин футболчиларда курашувчан характер бор. Намангандаги ўйиндан сўнг бизда жароҳатлар бор эди. Грузия терма жамоаси Европа чемпионатида ажойиб ўйин кўрсатиб, Португалияни 2:0 ҳисобида мағлуб этди. Умуман, грузин футболчилар ҳақида фикрим ижобий.

- "Қизилқум" чемпионат стартини яхши бошлаганди. Бироқ, кейинчалик натижаларда пасайиш кўзга ташланди. Бу нима билан боғлиқ?

- Аввал ҳам айтгандим, ҳозирги Суперлигамиз савия жиҳатдан анчайин кучайиб кетди. Ҳамма жамоа таҳлилларга асосланган футбол ўйнаяпти. Кучсиз кўринаётган жамоанинг ўзи йўқ. "Насаф" ёки "Пахтакор"ни олинг, кучли жамоалар, лекин улар ҳам ҳар бир ўйинда катта қийинчиликларга дуч келишмоқда.