"Гулистон" ҳам асосий ўйинчиларидан айрилиб қолиши мумкин

Жамоа бош мураббийи Бахтиёр Ашурматов ички имкониятлардан келиб чиқиб, ёшлар ижросида курашчан жамоа шакллантира олди. Лекин спортда, хусусан, футболда кўп нарса моддий томонга боғлиқ. Пули бор жамоанинг ошиғи олча, аксинча бўлса, омад ҳам юз ўгиради. Бунга кўп бор гувоҳ бўлганмиз. "Гулистон"нинг молиявий шароитлари ҳам бугунги кунга келиб ҳавас қиларли даражада эмас. Буни "Гулистон"нинг "Пахтакор"га қарши ўтказган Кубок баҳсидан кейин Ашурматовнинг ўзи ҳам айтиб ўтган.

Шу боис давралар оралиғида жамоа сафини бир қатор футболчилар тарк этиши кутилмоқда. Хусусан тажрибали ҳужумчи Носир Отақўзиевга собиқ жамоаси "Нефтчи"дан таклиф бўлган. Бу борада Отақўзиевнинг ўзи билан боғланганимизда,  иккинчи даврани Гулистонда ўтказиши сўроқ остида эканлигини маълум қилди. Шунингдек яна бир қатор етакчи футболчиларга олий лиганинг бошқа клубларидан совчилар бор. Биринчи даврада "Гулистон" таркибида ўзини кўрсатишга эришган ёш ўйинчиларга ҳам бошқа бир қатор клублардан қизиқиш борлиги айтилмоқда.


Исломбек Рустамбеков.