Kecha Berlindagi "Gerta" - "Borussiya" (1:1) uchrashuvi orqali 19-turga start berilgandi. Bugun turning qolgan oltita o'yini bo'lib o'tadi.

Eng e'tiborga moliq bahs "Xoffenxaym" hamda "Bayer" jamoalari o'rtasida kechadi. Turnir jadvalida deyarli yonma-yon ketayotgan bu ikki jamoalar faqat 3 ochko ilinjida maydonga tushishadi.
Yulian Nagelsmann va Xayko Xerlixx to'qnashuvida kimning qo'li baland keladi, degan savolga "Virsol Rein-Nekar Arena"da o'tadigan uchrashuv orqali javob olamiz.

Turnir jadvalida 2-o'rinda ketayotgan "Leyptsig" bugun "Frayburg" mehmoniga aylanadi. Ralf Xazzenxyuttl boshqaruvidagi "bo'qalar" o'tgan turlarda juda muhim ochkolarni qo'ldan boy berishgandi. Ularning baxtiga kecha "Borussiya" Dortmund Berlinda ochko yo'qotdi. Bu degani, agarda ular bugun g'alaba qozongudek bo'lishsa, unda "buqalar" turnir jadvalida eng yaqin taqibchilari biri sanalgan "Borussiya"ni 4 ochkoga ortda qoldirishadi. Aksincha, "Leyptsig" g'alaba qozona olmasa yoki mag'lubiyatga uchrasa, unda "Shalke"ni oldinga o'tkazib yuborish ehtimoli mavjud. Shuningdek, "Bayer" jamoasi ochko bo'yicha "Leyptsig"ga yetib olish imkoniyatiga ega bo'ladi.

Myonxengladbaxning "Borussiya" jamoasi esa "Augsburg" bilan kuch sinashadi. Diter Xekking va Manuel Baum o'rtasidagi duelda kim g'olib bo'lishini "Borussiya Park"dagi to'qnashuv hal qiladi.

Mario Gomes bilan o'z tarkibini qurollantirib olgan "Shtutgart" "Maync"ga safar uyushtiradi. O'z uyida engilmas sanaladigan "Shtutgart" joriy mavsumda mehmondagi o'yinlarda muvaffaqiyat qozona olmayapti. Bu safar ham eski tarix takrorlanadimi yoki Xannes Volf shogridlari noshux seriyaga barham berishadimi?

Ikkinchi davradagi ilk bahsda Dortmunddan muhim 1 ochko bilan qaytgan "bo'rilar" bu safar o'z uylarida "Ayntraxt" bilan to'qnash kelishadi.

Turnir jadvalining pastki o'rinlaridagi autsayder bahsida esa "Gamburg" "Kyoln"ni sinovdan o'tkazadi.

Bundesliga, 19-tur.

Bundesliga. Matchday