Бугун футбол. "Насаф" - "Навбаҳор"
14 июн 12:19
Янгиликлар

Бугун футбол. "Насаф" - "Навбаҳор"

Бугун Суперлиганинг 4-тур баҳслари давом эттирилади.

Қаршида "Насаф" "Навбаҳор"ни қабул қилади. Айтиш мумкинки, бу ўйинга турнинг марказий учрашуви сифатида қаралмоқда. Турнир жадвалида "Насаф" 9 очко билан иккинчи ўринда боряпти. Жамоа бунгача ўтказилган учта беллашувнинг ҳаммасида ғолиб чиққан. "Навбаҳор" эса 4 очко билан ҳозирча 8-ўринда боряпти.

Айтиб ўтганимиздек, "Насаф" аввалги учта турнинг ҳаммасида ғалаба қозонди. Қаршиликлар дастлаб "Қизилқум"ни 3:1, 2-турда "Андижон"ни 2:1 ва ўтган тур "Сурхон"ни ҳам 2:1 ҳисобида мағлуб этишди. "Насаф" ҳар учала ўйинда ўз дарвозасидан биттадан гол ўтказиб юборди. Лекин жамоа 9 очко жамғарганини ҳисобга олсак, карантингача анча яхши ўйин намойиш этгани ойдинлашади.

"Навбаҳор" эса бу йилги Суперлигани мағлубият билан бошлади. "Лочинлар" Тошкентда "Пахтакор"га 1:2 ҳисобида имкониятни бой беришди. Кейинги турни ўз майдонида "Локомотив"га қарши ўтказган жамоа 2:0 ҳисобида зафар қучишнинг уддасидан чиқди. Шундан сўнг Андрей Канчельскис шогирдлари Андижонга сафар қилиб меҳмонда 0:0 ўйнашди.

Бугунги баҳс "Навбаҳор"нинг сафардаги учинчи ўйини бўлади. Бунгача иккита беллашувда ғолиб чиқа олмаган наманганликлар бугун ютишга ҳаракат қилишади. "Насаф" эса қаторасига тўртинчи ғалабасини қўлга киритишга уриниб кўради.

P/S. Соат 20:00да бошланадиган ўйинни "Спорт" телеканали орқали тўғридан тўғри кузатиб боринг.

Насаф

Бобир Абдихолиқов - 66', Марко Станоевич - 87'

Суперлига. 4-тур

14/06/2020, 20:00

Тугади

Навбаҳор

Мирзоҳид Ғофуров - 5', Забиҳилло Ўринбоев - 69'

45'

90'