Боснияликлар посбони Никола Василь италиялик ҳамкасби Жанлуижи Доннарумманинг спортчига хос бўлмаган ҳаракатлари ҳақида гапириб берди.
Гап шундаки, "Интер" ҳужумчиси Франческо Эспозито пенальти тепаётган вақтда Доннарумма рақиб дарвозабонининг кўрсатмалар ёзилган қоғозини олиб, уни йиртиб ташлаган ва майдоннинг чеккасига улоқтирган.
"Жиджо менинг италян пенальтичилари ҳақидаги маълумотлар ёзилган қоғозимни йиртиб ташлашга уринди. Хайриятки, мураббийлар штабида яна битта нусха бор эди, биз ҳар қандай вазиятга тайёр эдик. Ростини айтсам, кўзларимга ишонмадим, фаолиятимда биринчи марта бундай ҳолатга дуч келдим.
Биз Доннарумма билан тортишиб қолдик, кейин мен ҳакамнинг ёнига бориб, унга сариқ карточка бериши кераклигини тушунтиришга ҳаракат қилдим. Унинг тутими ҳақиқий спортчига хос бўлмаган ҳаракат эди. Якунда биз ғалаба қозондик ва кўпчилик буни 'карма' деб атамоқда", — деди Василь.
Эслатиб ўтамиз, Италия пенальтилар сериясида 1:4 ҳисобида мағлуб бўлиб, кетма-кет учинчи бор Жаҳон чемпионатидан қуруқ қолди. Босниялик болбой эса кейинчалик Доннарумманинг ўз "шпаргалка"сини ҳам ўғирлаб кетиб, италиялик дарвозабондан ўч олган эди.
