⚡️ Биласизми? Ногирон-ампутантлар ўртасидаги ЖЧ-2022'да қатнашиш учун ҳар бир термадан бадал пули олинган. Соврин жамғармаси ҳақида эса маълумот йўқ

Афсуски, Ўзбекистон терма жамоаси ярим финалда минимал (0:1) ҳисобда мезбонларга имкониятни бой берди. Энди вакилларимиз 9 октябрда 3-ўрин учун Гаити билан баҳс олиб боради. Финалда эса яна Туркия – Ангола баҳси бўлиб ўтади. Улар ўтган мундиалда ҳам бир-бирига қарши тўқнаш келган ва ўшанда Африка вакили пенальтилар сериясида зафар қучиб, илк бор бош соврин эгасига айланганди.

Аввалроқ, мусобақанинг ҳал қилувчи ўйини 9 октябрь куни “Галатасарой”нинг 52 мингдан ортиқ томошабиннни ўз бағрига сиғдира оладиган муҳташам ўйингоҳи ("Турк Телеком Арена")да бўлиб ўтиши ҳақида хабар бергандик.

Бизга маълум бўлишича, мусобақада қатнашиш учун ҳар бир иштирокчи (24 та) терма жамоадан 5,000 (умумий 120,000) доллар миқдорида бадал пули олинган. Туркиядаги мундиалнинг соврин жамғармаси ҳақида эса аниқ маълумот йўқ.

Бироқ, фақатгина 2012 йил Россиянинг Калининград шаҳрида ўтган турнирда мусобақа ғолибига (ўшанда Ўзбекистон бўлган) 20 минг доллар пул мукофоти, иккинчи ҳамда учинчи ўринларга 15 ва 5 минг доллар миқдорида маблағ берилгани ҳақида хабарлар бор. Унгача эса ҳеч қандай соврин жамғармаси бўлмаган.