Барча бирдек эътиборда!
08 ноя 2019 13:00
Янгиликлар

Барча бирдек эътиборда!

Теглар : Бунёдкор

Ноябрь ойининг илк кунларида «Сен ёлғиз эмассан» Республика жамоатчилик болалар фонди «Бунёдкор» футбол клуби билан ҳамкорликда пойтахтимизда жойлашган Меҳрибонлик уйлари ўртасида турнир ўтказди.

«Бунёдкор» академияси майдонларида бўлиб ўтган мусобақада пойтахтимиздаги 21, 22, 23, 30-сонли Меҳрибонлик уйлари тарбияланувчиларидан ташкил топган жамоалар, Андижон вилояти болалар-ўсмирлар футбол академияси иштирок этди. Саккиз жамоа икки гуруҳда ғолиблик учун кураш олиб борди. Ўз гуруҳларида дастлабки икки ўринни эгаллаган Андижон вилояти болалар-ўсмирлар футбол академияси ва 22, 23, 30-сонли Меҳрибонлик уйлари жамоалари ярим финалга йўл олишди.

Финал йўлланмаси учун курашда рақибларидан устун келган 22 ва 23-сонли Меҳрибонлик уйи тарбияланувчилари чемпионлик учун курашган бўлса, андижонлик болалар 30-сон Меҳрибонлик уйидан ташриф буюрган тенгқурлари билан куч синашди. Қизиқарли учрашувлардан сўнг андижонлик меҳмонлар учинчи ўринни ўзиники қилган бўлса, биринчи ўрин 22-сон Меҳрибонлик уйи тарбияланувчилари насиб қилди.

Мазкур турнирни ташкил қилиниши, ўтказилишида «Сен ёлғиз эмассан» Республика жамоатчилик болалар фондининг Ҳарбий-спорт гуруҳлари кординатори Полихрониди Илья Петрович жонбозлик кўрсатганини таъкидлаш ўринли.