Александр Волков: "Динамо"нинг натижаси кўпчилик учун сенсация бўлиши мумкин, аммо мен учун эмас"

- Аввало, Самарқанд аҳлини янги мавсум билан табриклайман, «Динамо» жамоасини эса футбол байрамидаги ҳақли ғалаба билан қутлайман. Самарқандда бизни жуда оғир ўйин кутаётганлигини билардик ва шунга яраша пухта тайёргарлик кўрдик. Бироқ, минг афсуски бугун майдонда ҳеч нарса қила олмадик. Рақиб бизни ҳар томонлама мағлуб этди. Йирик ҳисобли мағлубият учун ҳеч кимни айбламайман, жавобгарликни ўз бўйнимга оламан. Қаердадир хато қилгандирман, балки футболчиларни ўйинга тўғри тайёрлай олмагандирман. Ўйинни тўлиқ таҳлил этиб, хатолар устида ишлаймиз.

- «Шўртан» - «Нефтчи» (1:0) ўйинидан кейин «Динамо»нинг Бекободдаги ғалабасини кутилмаган дея айтгандингиз. Бугун ҳам шу фикрдамисиз?

- Йўқ, ўшанда мен «Динамо»нинг натижаси кўпчилик учун сенсация бўлиши мумкин, аммо мен учун кутилмаган эмас, дегандим. Чунки мен мавсум олдидан «Динамо»нинг Тошкентдаги йиғинини кузатгандим. «Динамо» таркиб йиғиш ва бир қатор масалаларда муаммога дуч келган бўлсада, назорат ўйинларида мағлубиятларга учраган бўлсада, жамоанинг таркиби тўлиқ ёшлардан иборат эканлиги ва уларнинг кўзи қай даража ёнаётганлигидан ҳайратлангандим ва хавфсирагандим. Иштиёқ жуда кучли уларда. Ўшандаёқ бу жамоа чемпионатда кўпчиликни «қийнаши»ни кутгандим. «Металлург»ни мағлуб этганда мезбонлар уларнинг кучига тўғри баҳо беришмаган бўлса, бугун биз ҳам шундай ҳолатга тушдик деб ўйлайман.