Хави Жалолиддин Машарипов ва "Пахтакор"ни мақтади

"Кеча ҳам учрашув қийин бўлишини айтиб ўтгандим. Амалда ҳам шундай бўлди. Биз ўйинни яхши бошладик, тезкор гол урдик, бирозгина ўйинни назорат қилдик. Лекин шундан кейин устунликни мезбонлар ўз қўлларига олишди. Танаффусга қадар ўйинимиз яхши чиққани йўқ. Танаффусдан кейин вазият ўзгарди, биз рақиб жарима майдонига яқин ҳудудда хавфли жамоага айландик.

Гоҳ бу, гоҳ бу дарвоза ёнида хавфли вазият содир этилди. Қайд этилган дуранг натижани адолатли деб ҳисоблайман", - дейди Жезуалдо Феррейра.

"Мураббий тўғри айтиб ўтди. Дастлабки 15 дақиқада яхши ўйнадик. "Пахтакор" жуда яхши шаклланган жамоа эканлигини кўрсатди. Айниқса қанотларда яхши ҳаракат қилишди, чап қанотда ўйнаган вингери, Жалолиддин Машариповнинг ҳаракатларини алоҳида таъкидлаб ўтган бўлардим. Иккинчи бўлимда мураббий тактикани ўзгартирди ва ўйинни назорати бизг ўтди. Иккинчи таймда деярли бехато ўйнадик. Ютишимиз ҳам, ютқазиб қўйишимиз ҳам мумкин эди. Бутун ўйинни оладиган бўлсак дурангни адолатли деб айта оламан", - дейди Хави.

- Иккинчи тайм бошида айнан қандай ўзгариш содир этилди?
- Биринчи бўлимдаги ўхшамаган ўйинимизни рақибнинг қанотлари туфайли бўлди деган бўлардим. Осиё чемпионлар лигасидек мусобақада омад ҳам керак. Иккинчи бўлимда "Пахтакор"нинг қанотлари хавфини пасайтирдик ва ўзимиз хавфлироқ ҳужум қилишга ўтдик.

- ОЧЛда учта гол урдингиз. Эътиборлиси учала гол ҳам Санжар Қувватов дарвозасига урилди. Ўтган йил "Насаф"да ўйнаганида унга битта тўп киритган эдингиз. Бугун иккита гол...
- Фақат ўзбек клубларига гол ураяпман? Ҳа, "Насаф" билан баҳсда гол ургандим. Бугун яна ўша дарвозабон Қувватовга гол урдим? Ажойиб статистик маълумот, раҳмат. Очиғи билмагандим. Қувватовга Қатарда ҳам гол ураман (кулади).