Хаби Алонсо: "Жаҳон чемпионатида Испаниядан яхшироқ жамоани кўрмаяпман"

ЖЧ-2006, 2010 ва 2014 иштирокчиси ўтган мавсум футболчилик фаолиятини якунлаганидан бери ўзини мураббийлик соҳасида синашга яқин турибди. Мундиал олдидан Хаби Алонсо ўз терма жамоаси имкониятларини юқори баҳолади.

- Футболни тугатганингизга бир йил бўлди? Ишлар қандай кетяпти?
- Ҳаммаси жойида. Факт шуки, футболдан кейинги ҳаётим бутунлай ўзгарди. Бу менинг қарорим эди ва уни ўз вақтида амалга оширганимдан хурсандман.

- Нега айнан мураббий бўлишга қарор қилдингиз?
- Мураббийлик курсларида қатнашгач шу қарорга келдим. Мен футболчиларга янада яқин бўлишни хоҳлайман, бунинг учун эса мураббий бўлишим керак деб ўйладим. Биламан, бу жуда қийин касб, лекин мен ҳаракат қилиб бор кучимга ишга соламан.

- Хулен Лопетеги Испания терма жамоасида қандай ишлаяпти?
- У жуда яхши иш олиб боряпти, бунга шубҳа йўқ. Унинг мияси шубҳалардан холи ва бу жуда муҳим. У футболчиларга нима хоҳлаётганини жуда аниқ қилиб тушунтира олади. Агар сен футболчилар билан тил топиша олмасанг совринларга эга чиқмайсан. Буни Лопетеги яхши билади.

- 2010 йил Жаҳон чемпионатида ғолиб чиққан жамоа билан ҳозиргиси ўртасида қандайдир ўхшашликни кўряпсизми?
- Ўйин олиб бориш фикри ўзгаргани йўқ деб ўйлайман. Биз учрашувни назорат қилишимиз керак, ҳадеб олдинга ўтмасдан баъзан тўпни майдон бўйлаб айлантиришга тўғри келади. Лопетеги келиб терма жамоани кучайтира олди. Бу жамоа ақл билан ҳаракат қилмоқда, вақтни беҳуда сарфламайди ва техник томонлама юқори. Бу эса бизни бошқалардан ажратиб туради.

- Албатта, Испания ҳам фаворитлардан бири. Имкониятларни қандай баҳолайсиз?
- Бу шунчаки гап эмас, мен Испанияга ишонаман. Тўғрисини айтсам? 32та иштирокчи орасида биздан яхшироқ жамоани кўрмаяпман. Лекин ўйинларда нима бўлишини билмайман. Германия ҳам фаворит. Улар жуда кучли ва ҳозирги авлоди яхши футболчилардан иборат. Шунингдек, Бразилия, Аргентина, Франция ҳам бор. Аммо биз бу жамоаларнинг баридан зўрмиз.

- Жаҳон чемпионати ўйинларини кўриш учун Россияга келасизми?
- Менга катта учрашувларни стадионда кўриш ёқади, шу боис финал учун аллақачон чипта олиб қўйганман. Насиб қилса финал учун Россияга бораман, фақат борган пайтим Испания финалда бўлса бўлгани.