Владимир Андреев: "Сурхон" олдига чемпионатни 3-ўринда якунлаш вазифаси қўйилган"

Ўйиндан кейинги матбуот анжуманида термизликлар бош мураббийи Владимир Андреевнинг фикрлари қуйидагича бўлди. 

- Ўйин биз учун қийин кечди. "Пахтакор" ном жиҳатдан анча устун. Қолаверса клуб олдида учта фронтда ҳам ғалаба қозониш вазифаси турибди. Биз бугун меҳмонда ўйнаганимиз боис қарши ҳужум тактикасини қўлладик. Ўз имкониятимиз келишини сабр қилиб кутдик. Биринчи тайм бошларида қўлай вазиятга эга бўлгандик, аммо тўп кирита олмадик. Футболда шундай: сен урмадингми, сенга уришади. Якунда эса 0:2 ҳисобида имкониятни бой бердик. 

- "Пахтакор"ни энг кучли клуб дея оласизми?

- Ҳа, ҳозирги пайтда "Пахтакор" Ўзбекистоннинг энг кучли жамоаси. 

- Жамоангиз ҳақида мураббийлар штабидан ташқари яна ким биландир маслаҳатлашиб турасизми?

- Йўқ, фақат мураббийлар штабидагилар билан гаплашаман. Четдан ҳеч кимдан маслаҳат олмайман. 

- Жамоангизда иккита бразилиялик бор. Бири ўйнаяпти, иккинчиси захирада ўтирибди.

- Тўғри, легионер ўйнаши керак, лекин футболда ҳар ҳил холат бўлиб туради. Бу футболчилар ҳали тўлиқ тайёр эмас, вақти келиб ўзларини кўрсатишади. 

- Раҳбарият сизнинг олдингизда қандай вазифа қўйган?

- Аниқ гапирадиган бўлсам, Суперлигада 3-ўринни қўлга киритиш қўйилган.