Улуғбек Бақоев: “Ширинбой Абдуллаевни майдонга туширишни режа қилгандик”

Ўйин ҳақида

- Жуда қийин ўйин бўлди. Сабаби учрашув 17:00да бошланди. Иссиқ ҳавода ўйнашимизга тўғри келди. Қолаверса, “Сўғдиёна” тақвими бироз қийин. Чемпионат, кубок уОФК кубоги ва яна чемпионат баҳслари. Шундан келиб чиқиб таркибдаги ритмни ушлаб туриш учун, ротация қиляпмиз. Бугун ҳам шуни амалга оширдик. 

Қолаверса, учрашув 120 дақиқа давом этгани ҳам оғирлик қилди. ОФК кубоги ўйинига қадар тикланишга қийналамиз.

Иккита тенг кучга эга жамоа ўйнади. Ҳар биримизда ҳам етарлича вазиятлар бўлди. Ўйлашимча, дуранг адолатли бўлди. Пенальтилар сериясида омад бизга кулиб боқди. Бунинг учун йигитларга миннатдорчилик билдираман. Мазкур муваффақият билан жамоамиз мухлисларни табриклайман. 

- Ширинбой Абдуллаев пенальтилар серияси учун майдонга тушди. Бу ўйланган режамиди?

- Ҳа, албатта. Бизда футболчилар бўйича режалар бўлиб келган. Бугун ҳам шуни режа қилгандик. Яъни, мажбурий ўзгариш бўлмаса, пенальтилар серияси учун Ширинбойни майдонга туширишни мақсад қилгандик. Мураббийлар штаби Абдуллаев пенальтилар сериясида қандай маҳоратга эга эканлигини билгандик. У бугун ўзини оқлади.