U-20 Жаҳон чемпионатига Ўзбекистондан ташқари яна кимлар чиққан?

Ўқувчиларимизнинг талаб ва истакларини инобатга олиб ушбу мусобақа ҳақида дастлабки маълумотларни беришга қарор қилдик.

2015 йилги ёшлар ўртасидаги мундиалга Янги Зеландия мезбонлик қилади. ЖЧ 30 май куни бошланиб 20 июнь куни ўз якунига етади.

Мусобақа ўйинлари Янги Зеландиянинг 7та шаҳрида бўлиб ўтади. Мезбон шаҳарлар: Окленд, Кристчурч, Дунедин, Хамилтон, Нью Плюмоут, Вангареи, Веллингтон.

Унда жами 24та жамоа иштирок этади.

Мезбон Янги Зеландия тўғридан-тўғри йўлланмага эга бўлганини тушунитириб ўтириш шарт эмас.

Океания минтақасида бўлиб ўтган саралашда Фижи ёшлари чемпион бўлди ва ушбу мундиалда иштирок этиш ҳуқуқини қўлга киритди.

Шу йил ёзда Венгрияда бўлиб ўтган Европа чемпионатида иштирок этган 8та жамоанинг 6таси Янги Зеландиядаги Жаҳон чемпионатига йўлланма олди: Германия, Португалия, Сербия, Австрия, Украина ва Венгрия.

Кеча бўлиб ўтган ўйинлардан сўнг Осиё қитъасидан ушбу мусобақага борадиган тўртта жамоа номи маълум бўлди. Ўзбекистондан ташқари Мьянма, КХДР ва Қатар ёшлар терма жамоалари мундиалда иштирок этишади. Таъкидлаш лозимки, Мьянма худди Фижи сингари U-20 Жаҳон чемпионатига илк бор йўлланма олди.

Африка, Шимолий Америка ва Жанубий Америкадан тўрттадан жамоа Янги Зеландияга боради. Ҳозирча бу қитъаларда саралаш баҳслари бўлиб ўтмаган.

Африкадаги чемпионат 2015 йилнинг 8-22 март кунлари бўлиб ўтади. Шимолий Америкадаги саралаш 9-24 январь кунлари ташкил этилади. Жанубий Америкада эса ЖЧ йўлланмалари 14 январь - 7 февраль кунлари оралиғида ўйналади.


U-20 Жаҳон чемпионатига 2015 йилнинг 10 февраль санасида қуръа ташланади.


Нарзулла Сайдуллаев