Терма жамоамизга ўйинни ва футболчиларни бошқарадиган САРДОР керак

Эртанги баҳс соат 13:00да старт олади ва "Спорт" телеканали орқали эфирга узатиладими-йўқми, ҳозирча маълум эмас.

Биз учун муҳими эса терма жамоамизнинг сафардан ғалаба билан қайтиб келиши. Бунинг учун жамоамизда ишонч ҳам, салоҳият ҳам, куч ҳам етарли. 11 июнь куни Миржалол Қосимов шогирдлари Эронга қарши ўртоқлик учрашувида майдонга тушишди. Шунча имконият бўлишига қарамай, тўп кирита олмадик. Рақиб эса ўйин охирларида жуда фаол ҳаракат қилиб, битта гол билан ютиб кетди.

Албатта, ўз майдонингда ютқазиб қўйиш жуда аламли. Бу хоҳ ўртоқлик ўйини бўлсин, хоҳ расмий учрашув. Терма жамоаларимиз ва клубларимиз иштирокидаги баҳсларга эътибор беринг, бизда гол уриш учун етарлича вазиятлар бўляпти. Лекин фойдаланишга келганда ҳамон оқсаяпмиз. Бу муаммонинг ечими қаерда? Очиғи, биз бу борада бирор нарса дея олмаймиз. Бу саволга жавоб топиш авваламбор мураббийларнинг иши ҳисобланади.

Эрондан учралган мағлубиятга Миржалол Қосимов оддий ўртоқлик учрашуви сифатида қаради, бундан фожиа ясамаслигимиз кераклиги ҳақида гапирди. Албатта, бундан ҳеч ким фожиа ясаётгани йўқ. Фақат бизни нима учун қулай имкониятдан тўп кирита олмаётганимиз хавотирга соляпти.

Миржалол Қосимов - бош мураббий. Ҳар қандай бош мураббий билан бўлгани каби Қосимовнинг ҳам иши майдон чизиғига етганда тугайди. Буёғи энди футболчиларнинг ўзига боғлиқ. Қосимов кўрсатмаларни тўғри бериши, ўйинчиларни руҳлантириши мумкин, аммо майдондаги ишнинг катта қисми барибир футболчининг ўзида қолади. Буёғига жамоани бошқариш осон кечмайди. Майдонда футболчиларни бошқариш учун эса бош мураббиймизга ёрдамчи керак.

Мураббий майдонга тушган 11 нафар футболчининг ҳаммасига бирдек ишониши мумкин, аммо унинг суянадиган ўйинчиси, аниқроғи майдондаги ёрдамчиси битта бўлади. Ва бу футболчида етакчилик қила билиш хусусияти, шерикларини бошқара олиш қобилияти бўлиши керак. Эҳтимол, бу футболчи жуда зўр ўйинчи бўлмаслиги мумкин, аммо у майдонда етакчи бўлиши, бошқалар унга қулоқ солиши шарт.

Ўз вақтида Патрик Виейра "Арсенал"да, Рой Кин МЮда шунақа футболчи эди. Улар жуда чиройли ўйин кўрсатмаса-да, муҳими, жамоани бошқара олишарди. Улар бош мураббийнинг майдондаги вазирлари эди. Бошқалар мураббийдан кейин айнан шу футболчиларнинг гапига қулоқ соларди. Ўйлашимча, бизда ҳам шундай футболчи бор, бу - Азиз Ҳайдаров. Азиз Ҳайдаров - табиатан ғолиб, енгилишни ёқтирмайди. Бунга унинг "Локомотив" ва "Бунёдкор" сафидаги ўйинлари орқали ҳам кўп бор гувоҳ бўлганмиз.

Азиз Ҳайдаров ҳеч қачон диққат-марказдаги футболчи бўлмаган, ундан Сардор Рашидовга ўхшаб ўйнашни кута олмаймиз. Лекин айнан у жамоани бошқара олади. Фикримизча, Қосимов айнан Азиз Ҳайдаровга сардорлик боғичини топшириб, уни майдондаги ўнг қўли этиб тайинлаши керак. Биз бу гапларни нима учун айтяпмиз? Эрон билан ўйин шуни кўрсатдики, ҳамма ўзича ҳаракат қилди. Кимнидир ёмон ўйин кўрсатди дея олмаймиз, барча мураббий берган кўрсатмалардан келиб чиқиб тўп тепди. Лекин шу куни ўйинни ва шерикларини бошқарадиган футболчи кўзга ташланмади. Натижада терма жамоамиз ЖАМОАга эмас, 11 нафар қобилиятли йигитлар йиғиндисига ўхшаб қолди.

Аввало Игнатий Нестеровнинг нима учун сардор этиб тайинлангани тушунарсиз бўлди. Айтайлик, "Ювентус"да Буффон сардор бўлиши мумкин, лекин бизнинг менталитетдан келиб чиқиб айтганда, сардорлик боғичи майдонда ҳаракатланадиган ўйинчидан бирида бўлиши керак. Ва шу футболчи шериклари учун ҳам жавоб бера олиши лозим. Терма жамоа сардори жамоадаги энг яхши футболчи бўлиши шарт эмас, муҳими у шерикларини бошқара олсин, танбеҳ берганда ҳамма унга қулоқ солиши шарт.

Мен жамоа сардори деганда курашувчан, бошқаларни ҳам шунга ундай оладиган ўйинчини тушунаман. Терма жамоа сафида нечта ўйинда тушганига эмас, балки характерига, унда спортча ёвузлик бор-йўқлигига қарайман.  Спортда характер жуда катта роль ўйнайди. Ва шундай характерга эга футболчи бизда бор ва унинг борлигидан фойдаланиб, жамоани ўша ўйинчи атрофида қуришимиз керак.

Миржалол Қосимов - терма жамоа бош мураббийи, у кишига ақл ўргатишга бизнинг ҳаққимиз йўқ. Фақат жамоа манфаати учун шу гапларни айтмасак бўлмасди. Чукнки Эрон билан ўйинни юқоридан кўрганимизда терма жамоа жипслашган жамоа сифатида кўзга ташланмади. Футболчиларга майдондаги бошқарувчи етишмади. Азиз Ҳайдаров ўйнагани билан унга қўмондон томонидан қолганларга бошчилик қилиш вазифаси топширилмагани учун у ҳам оддий аскардек ҳаракат қилди.

Агар Қосимов ҳаммани бир жойга йиғиб, ўйин пайти мендан кейин шу футболчига қулоқ соласизлар дея, сардорлик боғичини Азиз Ҳайдаровга топшириб, уни расман ўнг қўли деб эълон қилса, ўйлаймизки, шундагина биз ҳақиқий Ўзбекистон терма жамоасини кўрамиз.

Х.Холиқов.