Терма жамоа охирги машғулотини ўтказди (ФОТО)

Аввалига соат 10:00да футболчилар ҳамда мураббийлар штаби “Ўзбекистон” меҳмонхонасида ЎФФ президенти Мираброр Усмонов билан учрашишди. Учрашув мобайнида федерация раҳбари йигитларга оқ йўл тилади ва жамоамиз олдига чемпионлик вазифаси қўйилганини маълум қилди.

Шундан кейин терма жамоа автобуси “Жар” стадиони томон йўл олди ва у ерда футболчилар бир соатлик машғулот ўтказишди. Машғулотда Осиё ўйинларида иштирок этиш учун терма жамоага жалб қилинган барча ўйинчилар иштирок этишди. Йигитларнинг ҳаммаси соғ, ҳеч кимда жароҳат йўқ.

Машғулотни одатдагидек терма жамоа бош мураббийи Миржалол Қосимов ҳамда унинг ёрдамчилари Шуҳрат Мақсудов, Бахтиёр Ашурматов ва Пётр Гизимчук ўтказишди. Бугун кечки пайт терма жамоамиз делегацияси Инчон сари йўл олади. Осиё ўйинларида футболчиларимизга омад тилаб қоламиз.