"Сурхон" супер ўзгаришлар арафасида, Ботир Мирзаев янги бош директор!

Афсуски бу йил жамоа кучлилар қаторига қўшила олмади. ПРО-Лигада 4-ўринни қўлга киритган клубда 2019 йилда туб ўзгариш бўлади. Клуб ҳомийлари "Сурхон"ни кучлилар қаторига қайтариш учун жиддий бел боғладилар ва энди у ерда ўз касбининг мутахассислари фаолият олиб борадилар. Бу нафақат мураббий, балки клуб структурасида ҳам амалга ошириладиган асосий иш. Сўнгги икки йилда айнан шу омил клубнинг муваффақиятига салбий таъсир ўтказди.

Бизга маълум қилишларича, 9 йил давомида "Олмалиқ" жамоасида фаолият олиб борган Ботир Мирзаев клуб бош директори сифатида иш бошлади. "Олмалиқ" жамоаси унинг раҳбарлигида олий лигада ёмон натижалар қайд этмаган. 2009 йил мавсумни 4-ўринда тугатган клуб, 2013-15 йиллар оралиғи кучли олтиликдан пасга тушмаган.

"Бизга нафақат жамоани, балки клубни ривожлантириш вазифаси қўйилди. "Сурхон" жамоасининг барча чизиқларини яхши савиядаги футболчилар билан кучайтирамиз. Структурада ҳам катта ўзгаришлар бўлади ва узоқ йиллар давомида футболда ишлаган мутахассислар, клубнинг футбол мактаби, маркетинг, матбуот хизматларига жалб этилади. Лицензиялаш бўлимига ҳам энг малакали мутахассисларни жалб қиламиз", - дейди Ботир Мирзаев.